Solnørvika camping i Skodje ligg berre få meter frå eit industriområde, der Allskog laster tømmer. Lastinga skjer ofte på nattetid og campingeigar Jan Hemning Dale meiner at støyen skremmer bort campingturistane.
I slutten av april i år gjorde Fylkesmannen eit vedtak om å regulere støy ved tømmerkaia etter at Dale klaga. Dette innebar at tømmerlastinga ikkje skulle skje på sommarnetter og på helgedagar.
No har Miljøverndepartementet kjent vedtaket ugyldig. Dette gir Allskog lov til å drive vidare. Det var Sunnmørsposten som først omtalte saka.
LES OGSÅ:
Betyr mykje
Anna Moe i Allskog seier at det betyr mykje for bedrifta at dei igjen får drive som normalt, og drive tømmertransport døgnet rundt.
– Det betyr at skogeigarane på Sunnmøre får høve til å tene pengar på tømmeret sitt, ved at vi får full fleksibilitet på kaia på Håhjem, seier Moe.
Gå rettens veg
Campingeigar Jan Heming Dale meiner at Miljøverndepartementet har brukt feil regelverk når dei har handsama saka.
– Vedtaket er meiningslaust og heilt bak mål. Dei brukar forureiningslova i staden for plan og byggelova, seier Dale.
For hans del er ikkje siste ord sagt.
– Eg må truleg gå til rettssak mot kommunen. Dette er uakseptabelt for oss og gjer situasjonen uleveleg for oss. Arbeidsplassen vår er øydelagt, seier Dale.
