For femte gong i historia rykkjer Aalesunds Fotballklubb opp til høgste nivå i norsk fotball.
Dermed blei det eit kort opphald i 1.-divisjon for laget frå sunnmørsbyen. Trenar Lars Arne Nilsen var langt ute på bana å feira då David Olafsson chippa inn 4–2 til heimelaget på overtid.
– Eg var ikkje sikker før på 4–2. Då den sat så trur eg de såg at eg følte det var i boks. Betre regi enn dette kan du ikkje få. Så mykje folk og heile byen i ryggen. Det er som regi frå Hollywood, seier Nilsen.
Over 8500 tilskodarar hadde møtt fram. Det har ikkje vore så mange på fotballkamp i Ålesund på lang, lang tid.
Forventingane var store, og før kampen hadde klubbleiinga gått høgt ut å varsla at dei hadde kjøpt inn fyrverkeri. Til deira glede kunne verken sunnmørsk vêr og vind, eller Ull/Kisa hindre festen.
Jamt før pause
Men sigeren kom ikkje utan motstand. Fyrste omgang var jamspelt, og det blei knyst stille på stadion då Henrik Kristiansen sende Ull/Kisa i leiinga med eit vakkert frispark.
Vidare ut i omgangen kriga Aalesund for å få kontroll. Fem minutt før pause fekk dei løn for strevet. Sigurd Haugen sette ballen i mål, og heimefansen kunne juble i ei blanding av lette og glede.
– Det følast utruleg godt. Eg er aller mest letta. Vi har følt på presset no i haust, seier tomålsscorar Sigurd Haugen til NRK etter kampen.
Også andreomgang starta tett, og Ull/Kisa gav heimelaget nok ein kalddusj etter 69 minutt. Då sette Sondre Sørløkk ballen i mål etter ei strålande langpasning i bakrom frå Jens Berland Husebø.
Men det var ein kveld for fine frispark. Då klokka viste 78 minutt leitte Simen Bolkan Nordli fram godfoten. Ballen gjekk over muren og i mål, og Bolkan Nordli sende stemninga på stadion til himmels.
Etter dette gjekk lufta litt ut av bortelaget og AaFK styrte det meste fram til David Olafsson toppa kransekaka med å chippe ballen over keeper og sikre 4–2 sigeren på overtid.
Takka av Lie
Kampen blei nok ekstra spesiell for keeper Andreas Lie. 34-åringen har bestemt seg for å leggje opp etter sesongen. Dermed var dette siste heimekamp i ei lang Aafk-karriere.
I haust har ålesundaren vore reservekeeper. Då opprykket var sikra blei Lie bytta inn, fem minutt på overtid.
– Eg er veldig, veldig glad. Å få rykkje opp med så godt som full stadion er eit verdig punktum. No følast det godt, seier Lie.
Var det avtalt at du skulle få kome inn om de leia med to?
– Nei, Lars Arne sa eg skulle få kome inn uansett. Han så han ville sett meg inn om det var 3–2 også. Eg sette veldig pris på dette, seier Lie.
Lie har studert journalistikk ved sidan av fotballsatsinga. No går han til ny jobb som sportsjournalist i Sunnmørsposten.