På 1700 og 1800-talet var det vanleg med ulv på Nordvestlandet, men for rundt 150 år sidan forsvann ulvestammen.
– Ulv var eit stort problem. Økonomisk var det katastrofe når ulven tok dyra, seier historikar og forfattar Astor Furseth.
Han har skrive bok om rovdyr, og veit at fleire gardar vart fråflytta fordi ulven herja, blant anna i Volda.
Ulven herjar
No har ulven igjen dukka opp. Mange sauer og lam har blitt drepne av ulv i Lesja og i Brøstdalen i Rauma. Natt til søndag vart ein av ulvane felt, medan det framleis vert jakta på ulv nummer to, som har forsynt seg av saueflokkane på beite.
Manglar instinkt
Historikaren trur dagens sauer manglar instinktet for å passe seg for ulven, sidan dei ikkje har opplevd dyret før.
– No har det gått mange generasjonar sidan det var ulv i området og sauene er ikkje vand med dette rovdyret. Min teori er at instinktet er borte, seier Furseth.
I går vart det funne ein sau som var drepne av ulv, berre 200–300 meter frå hytta hans på Lora.
– Eg kan ikkje tenkje meg at ulven er farleg for menneske, men folk er oppskaka fordi husdyra vert tekne, seier Furseth.