Har du nokon gong sola deg på stranda iført bikini i Oslo i februar? Billigselskapet Ryanair reklamerte for ferieturar til varmare strøk i februar og mars, og hevda at du kunne «booke sola for åtte pund».
Oslo er blant reisemåla på lista.
Null grader
«Noreg på seinvinteren er nok ikkje det dei fleste ser for seg som ein varmande ferietur», skriv Daily Mail. Reklamen viser ei bikinikledd dame som solar seg på stranda med ein drink i handa. «Book to the sun now!» står det på plakaten, som lovar soltur for åtte pund éin veg om du reiser i februar eller mars.
Gjennomsnittstemperaturen i Oslo på denne tida er mellom null og fire grader. Solhungrige turistar som hoppa på tilbodet vart møtt av Ski-VM, snø og frysetemperaturar i staden for sol og strandliv.
Andre destinasjonar Ryanair har inkludert, men der det er liten sjanse for å få noko sol på denne tida av året, er Glasgow, Århus og Bilund i Danmark, Frankfurt, Hamburg og Düsseldorf i Tyskland. Gjennomsnittstemperaturane desse stadane i februar og mars ligg mellom seks og ni grader.
LES:
– Misvisande
Flyselskapet får kritikk for å ha reklamert for billige solreiser til destinasjonar der det verken er sol eller sommar. Kontrollorganet Advertising Standards Authority (ASA) har konkludert med at Ryanair villeia kundane sine.
«På grunn av slagordet og biletet av ei dame i bikini på stranda vil forbrukarane tru at kampanjen inkluderer destinasjonar som er varme nok til å sole og bade seg i i løpet av kampanje-perioden», skriv dei.
Oppgav feil pris
Flyselskapet får også kjeft for å ha reklamert for flyreiser til Dublin for 27.99 pund. Fleire har klaga på at det var umogleg å bestille reisa til denne prisen, på grunn av den ekstra innsjekkingsavgifta på seks pund.
Ryanair kunne ikkje forklare nøyaktig korleis ein fekk kjøpt denne flyreisa for 27.99 pund, ifølgje ASA.
Både Ryanair og konkurrenten Easyjet har fått kritikk for mange av reklamene sine. Dei har saksøkt og klagd inn kvarandre til kontrollorganet ASA fleire gongar.
LES: