Departementet avviser krav om gransking av regjeringskvartalet

Fleire store arkitektkontor sende måndag kveld eit opprop der dei ber om at det blei oppretta ein uavhengig kommisjon som skal evaluere konkurransen om nytt regjeringskvartal.

Team G8+, som blei nummer to i konkurransen, har tidlegare klaga til Statsbygg fordi dei meiner deltakarane deltok på ulike vilkår. Fleire av kontora på vinnarlaget, Team Urbis, har tidlegare på oppdrag frå Statsbygg vore med å utarbeide reguleringsplanane for området. Men klaga blei avvist Statsbygg.

Nei frå departementet

No blir også oppropet og kravet om ein uavhengig granskingskommisjon avvist av departementet:

– Kommunal- og moderniseringsdepartementet ser ingen grunn til å fråvike dei etablerte ordningane, Klagenemda for offentlege anskaffingar og det alminnelege rettsapparatet. Det er ikkje aktuelt å utnemne ein kommisjon slik oppropet tek til orde for. Eg kan ikkje sjå at det er kome nokre konkrete innvendingar til dei svara Statsbygg har gjeve på klaga, skriv statssekretær Paul Chaffey i ein e-post til NRK.

• Les:
• Les: Redd oss fra regjeringskvartalet

Fleire av laga som tapte kampen om å få teikne det nye regjeringskvartalet, har støtta Team G8+ i klaga til Statsbygg. Og både Team G8+ og fleire andre av laga har vurdert søksmål mot Statsbygg om det skulle bli avdekka feil.

Kostbart prosjekt

Regjeringskvartalet er eitt av dei største og dyraste byggeprosjekta i Noreg gjennom tidene. Statsbygg har tidlegare sagt at den totale prislappen truleg blir eit tosifra milliardbeløp. Så langt er det brukt over 5,8 milliardar kroner på blant anna opprydding, midlertidige sikkerheitstiltak og planlegging av nytt regjeringskvartal.

Ifølge framdriftsplanen til Statsbygg, skal Stortinget vedta byggestart av eit nytt regjeringskvartal i 2019. Og så skal det vere innflyttingsklart seinast i 2027.