– Teknologi for fjernkontrollerte løysingar på skip finst allereie. Spørsmålet er kor langt me kan komma i retning av ubemanna fartøy, og kva typar skip dette er mest eigna for. Norske fjordar er ideelle testområde.
Det seier Jann Peter Strand, produktsjef for automasjon og kontroll i Rolls-Royce Marine.
Maritim industri trur at skip som er meir eller mindre ubemanna berre er få år unna.
– Me er tidleg i løypa, men ser gode moglegheiter for ubemanna fartøy, eventuelt at mannskap er om bord og kan gripa inn om naudsynt.
Verdas første testområde
Kystverket og Sjøfartsdirektoratet opna i dag Trondheimsfjorden som verdas første testområde for ubemanna skip.
Rolls-Royce trur såkalla autonome skip kan vera klare allereie om fire år.
Omtrent like optimistisk er seniorforskar Ørnulf Jan Rødseth i Marintek/SINTEF.
– Rundt 2020 er det realistisk å ha tilgjengeleg teknologi som kan setjast i drift.
Ørnulf Jan Rødseth er seniorforskar i Marintek/SINTEF.
Foto: Privat- Les også: – Ubemanna skip er framtida
Rødseth ser føre seg lokal konteinartransport som eit aktuelt døme.
– Mykje tryggleik, juss og praktiske løysingar må drøftast, men me er i dialog med aktørar om ulike løysingar for kommersiell drift som kan vera på plass i 2020, seier Strand.
TRYGGARE? Jann Peter Strand i Rolls-Royce trur ubemanna skip kan vera tryggare enn skip styrt av menneske.
– Globalt på sikt
– I første omgang blir det snakk om lokal transport, men på sikt også global skipsfart, trur Strand.
– Dagens sjøtryggleik er i stor grad bygd på at det er personar om bord, og me ønsker god dialog med utviklingsmiljøa for å kunna utvikla vår rolle både som myndigheit og tenesteleverandør, seier sjøtryggleiksdirektør Arve Dimmen i Kystverket.
Fleire store og små selskap jobbar med dei naudsynte teknologiane som skal til, og 4. oktober blir organisasjonen Norsk Forum for Autonome Skip skipa. Dei største aktørane i Noreg er ifølge Rødseth Kongsberg-gruppa og Rolls-Royce.
FLYTANDE ROBOT: Selskapet Maritime Robotics har utvikla ein liten sjølvgåande båt som verken er bemanna eller fjernstyrt.
Foto: Andreas Misje / Maritime Robotics– Noreg i særstilling
– Den faktiske teknologien blir i stor grad utvikla her i landet. Derfor er det veldig gledeleg at norske styremakter er positive til at me kan testa løysingane våre i norske farvatn, seier Strand i Rolls-Royce.
– Det er veldig stor aktivitet, og dette er ei kjempemoglegheit for norsk industri og transportnæring, seier Rødseth.
Han meiner Noreg er i ei særstilling, med nyskapande industrimiljø i til dømes Haugesund, Ålesund og Trondheim som kan landa denne teknologien.
Han håpar det blir opna for testing også i andre fjordar langs vestlandskysten.
– Men kva skjer med kajakkpadlaren som kjem i vegen for ei kapteinslaus ferje eller eit ubemanna konteinarskip?
– Vi jobbar med saka. Sikkerheit er heilt essensielt, seier Rødseth, og viser til at mesteparten av sjøfartsulukkene skuldast menneskeleg svikt.
– Ubemanna skip kan slik sett vera tryggare, på ein måte.
