Meteorologisk institutt har sendt ut ekstremvarsel for ti fylke, inkludert Sørlandet. Ekstremværet som har fått namnet «Petra» er forventa å slå til for full kraft natt til torsdag, med store mengder nedbør.
Det har allereie vore store nedbørsmengder dei siste dagane, noko som har ført til flaum fleire stader på Agder.
- Les også:
Står utan vatn
I Gjerstad står idrettsanlegg under vatn, Prestfossdammen har gitt etter og kommunen er i kontinuerleg beredskap. Ordførar Kjell trygve Grunnsvoll seier han aldri har opplevd slike vassmengder i Gjerstad, som fører til fleire konsekvensar for innbyggjarane.
– Eg har registrert at nokre har fått problem med kloakken. Men den klart største utfordringa har vore framkomelegheita. Det har vore nokre stengde vegar, og nokre vegar som ikkje har vore framkommeleg på grunn av høg vasstand.
I tillegg til dette er store delar av Gjerstad utan drikkevatn etter flaumen i Gjerstadvassdraget.
Den store vassføringa dei siste dagane har påført skadar på leidningsnettet, opplyser kommunen.
Det arbeidast no med å finne og reparere skadane, og fleire område vil vere utan vatn medan feilsøkinga går føre seg.
- Les også:
Opp mot 70 millimeter nedbør
Statsmeteorolog Rafael Escobar Løvdahl fortel at sørlendingane må førebue seg på mange millimeter nedbør det neste døgnet.
– I dag kan det kome opp mot 30 millimeter nedbør. Når det gjeld torsdag så kan det kome frå 30 til 70 millimeter nedbør. Så det blir innmari mykje, hovudsakleg frå siste del av onsdagen og natt til torsdag. Det er denne situasjonen vi har valt å kalle «Petra», og den vil nok skape store problem.
Førebels har «Petra» ramma Austlandet verst, men det kan endre seg når bygene aukar natt til torsdag.
– Det er Agder-fylka som først får føling med været, seint onsdag kveld. Deretter vil det bevege seg nordover i løpet av torsdag formiddag. Dei fleste fylka vil bli ramma, men ikkje alle like mkjye, seier vakthavande meteorolog Øyvind Johnsen til NTB.
- Les også:
Høg vassføring i fleire dagar
Dagleg leiar i Arendalsvassdragets Brugseierforening (AVB), André Gjerde, forventar at flaumtoppen er nådd, men er framleis spent på torsdagen.
– Vi har gjort tiltak i framkant av denne flaumen, ved å førehandstappe dei største magasina våre. Vi har tatt høgde for forventa nedbør som kjem torsdag, men viss det kjem meir nedbør enn forventa så har vi ikkje meir reguleringskapasitet igjen.
Han ber folk vere aktsomme på grunn av den høge vassføringa.
– Eg har sett at mange har gjort tiltak for å redusere skadeomfanget. Ein må passe på at ein ikkje tek nokre sjansar i nærheita av vassdrag. Vassføringa vil vere høg mange dagar framover, sjølv om det sluttar å regne torsdag.