Politiet på Sunnmøre meldte tysdag kveld klokka 22.15 om brann i ein firemannsbustad på Dimna seint tysdag kveld.
Ifølgje operasjonsleiar Leif Arne Valderhaug er éin mann arrestert etter å ha starta brannen på badet.
– Det vi kan seie er at vi fekk melding like etter kl. 22.00 om brann i firemannsbustad på Dimna. Då vi kom til staden arresterte vi ein person i femtiåra, og sikta han for eldspåsetjing.
Valderhaug seier brannen fann stad like etter avkøyringa til Dimna i Ulstein. Operasjonsleiaren seier den arresterte femtiåringen vil bli køyrt til Ålesund og sett i arrest.
– Innrømmer eldspåsetjinga
– Veit de noko om bakgrunnen for eldspåsetjinga?
– Vi vil ikkje kome innpå årsak til hendinga, men den sikta har innrømt forholdet.
Valderhaug stadfestar at fire personar budde i huset, og at alle kom seg ut. Éin av personane – ei kvinne – vil verte undersøkt av helsepersonell på staden.
Skadane på bustaden er avgrensa til badet, samt røykskadar.
Saka vert etterforska av lensmannen i Ulstein og Hareid.
