Gårsdagens episode av serien Utkant har vore det store samtaletemaet i Sunndal kommune i dag. Der fekk sjåarane vere med ungkar Lars Peder Stave og venene hans på alt ifrå åkerrally til fest i fjøset.
Ordførar i Sunndal kommune, Ståle Refstie er ikkje redd for at alle fordomar mot bygdeungdomen vart stadfesta. Tvert imot.
– Eg synest serien er kjempemessig og føler at ungdomane vart presentert både som kreative og ressurssterke, seier Refstie. Han karakteriserer episoden som eit ærleg bilete av ungdomen.
Artig på bygda
Lars Peder Stave vart med i serien for å vise kor artig det er å bu på bygda og kor sterkt samhaldet er.
– Eg håper folk ser at vi berre er oss sjølve. Det er sjølvsagt mange tullingar som bur her også, men vi er ekte, seier Lars Peder til NRK.
Kjenner seg att
Alle ordførar Ståle Refstie har prata med i dag, likte biletet som vart teikna av Øksendalungdomen.
– Eg kjenner meg att frå min eigen ungdom. På bygda må ein lage underhaldninga sjølv, seier ordføraren.
På fest
– Kva tenkjer du om at det var mykje alkohol med i programmet?
– Å gå på fest er ikkje eit bygdefenomen. Der er byungdomen ikkje noko betre, seier Refstie.