– Det var så mykje folk at eg måtte presse meg fram til startstreken.
Det fortel 15 år gamle Live Solheimdal, som er langdistanseløpar i friidrettsklubben Molde Olymp.
Laurdag formiddag var ho éin av 1315(!) utøvarar på startstreken av KK-mila i Oslo. Løpet er for jenter og kvinner, og går over fem kilometer.
15 år gamle Live Solheimdal frå Molde er rekna som eit stort langdistansetalent i Molde.
Foto: Tone Johannessen Solheimdal– Ein måtte vere litt frekk
Solheimdal gjekk hardt ut frå start, og tok raskt leiinga.
– Eg leia heile løpet, og låg eigentleg langt framfor dei andre. I byrjinga måtte eg derimot vere litt frekk og presse meg fram, seier 15-åringen til NRK.
Utover i løpet fekk ho besøk bakfrå.
– Etter kvart kom det ei anna dame, ho var sikkert litt oppe i 30-åra. Ho låg lenge bak meg og jakta.
– Men eg klarte å halde heilt inn. Eg spurte i mål og det blei siger, fortel ei sprudlande glad Solheimdal.
– Kva syntest ho om å bli slått av ein 15-åringen frå Romsdalen då?
– Nei, det trur ikkje eg ho likte. Men ho gratulerte meg då kom i mål då, svarer 15-åringen.
Vinnartida var 19.36, så vidt framfor nummer to.
Her er 15-åringen frå Molde like etter KK-mila i Oslo. Ho vann med tida 19.36.
Foto: Tone Johannessen SolheimdalPå landslagssamling i handball
Solheimdal er rekna som eit stort friidrettstalent i Molde, og har delteke i Toppidrettsveka og mange ulike løp i Noreg.
– I det siste har det derimot blitt mest eigentrening og handball. Eg prøver å drive på høgt nivå i både handball og friidrett, fortel 15-åringen.
Ho har tidlegare i år og i fjor delteke på landslagssamlingar i handball, samtidig som ho spring langdistanse for Molde Olymp.
– Det er kanskje ikkje så lett å velje kva ein skal drive med?
– Nei, det er det ikkje, men eg vil halde på med begge deler så lenge som mogleg. Kombinasjonen er veldig god, meiner Solheimdal.
– Men kvifor er akkurat du så god då?
– Nei, det veit eg ikkje ... Men eg har fått veldig mykje støtte frå ho mamma og han pappa. Dei melder meg på der eg har lyst å delta, og så får eg det eg treng. Eg er vel eigentleg ganske bortskjemd, flirer jenta – som blir 16 år om éi veke.
Etter målgang blei ho gratulert av Else Kaas Furuseth, kjent frå TV. Ho leia arrangementet.
Foto: Tone Johannessen Solheimdal
