Sambuarparet flytte tilbake til heimkommunen sin Ulstein etter å ha fullført studie i Trondheim. Dei hadde håpa å finne seg ein bustad til rundt 2,2 millionar kroner i Ulsteinvik, men det er ikkje råd i den pressa bustadmarknaden, skriv Nærnett.
Å leige er heller ikkje eit alternativ.
– Det er dyrt å leige bustad i Ulsteinvik og utvalet er dårleg. Det er ofte dyrare å leige enn å betale ned på eit bustadlån
Det seier Cecilie Roppen.
Bur i hytte på fjellet
I påvente av å finne ein bustad dei har råd til, må dei dermed bu i ei hytte utan vaskemaskin, oppvaskmaskin og skikkelege kokemoglegheiter.
Internett har dei heller ikkje, og dermed må dei heim til foreldra for å betale rekningar i nettbanken og vaske klede.
Det hastar med å finne seg ein annan stad å bu. Når vinteren kjem, brøytar ikkje plogen vegen fram til hyttene og det vert vanskeleg å ta seg fram i djupsnøen.
Pressa til høgt lån
Fleire gongar den siste tida har dei vore på visningar, men bustadane er for dyre. Dei kan ikkje ta opp lån på nærare tre millionar kroner.
Paret føler seg pressa til å betale over takst, og syns det er skummelt å skulle ta på seg eit høgre lån enn nødvendig når dei er så unge, skriv Nærnett.
– Ulsteinvik er dyrt, men det er her vi vil bu. Vi har venene og familiane vår her, difor er ikkje andre kommunar attraktive for oss. Det er her vi høyrer heime, seier Cecilie.
Christoffer synest at det er bittert at prisane har stige så mykje at dei ikkje har råd til ein bustad, trass høg utdanning og gode jobbar.