Grått vêr for «Saudehornet rett opp»

Det våte vêret sette ingen stoppar for motbakkespesialisten Torbjørn Ludvigsen. Han var nemleg vinnaren av årets «Saudehornet rett opp», og kom til toppen etter 52 minutt.

I dameklassa var det May Britt Buer som kapra førsteplassen, og ho kom fram om lag åtte minutt etter Ludvigsen.

Ville sjå utsikta

Henning Røyset var også ein av deltakarane i årets motbakkeløp. Han skulle ønskje at dei slapp tåka.

– Det var mykje tåke på toppen. Men det er fin temperatur, så det går veldig greitt. Det har vore skodde dei to siste åra eg har gått her, så eg må nok gå neste år også for å få med meg utsikta, seier Røyset.

– Vêret skulle vore annleis

Fleire meinte at vêret kunne vore betre. Blant dei var deltakaren Inge Ose. Halvvegs til toppen og godt motivert seier Ose at han er klar for å klatre seg vidare.

– Det går greitt, og no skal vi til topps. Utsikta har vi sett før, så den er det ikkje så nøye med. Men det er likevel litt trist at vêret vart slik. Men no får vi sige vidare, sa Ose.

Fleire resultat kan du finne på «Saudehornet rett opp» si heimeside.

Motbakkeløpet som startar i Ørsta sentrum og endar opp rett ved toppen av Saudehornet som er 1303 meter over havet. «Frå tareblad til tinderad», som dei skriv på heimesida si. I år er det tiande gongen «Saudehornet rett opp» vert arrangert.