– No har vi gjeve eit fellingsløyve fram til 17. juli, altså i to veker.
Det seier Linda Aaram, fungerande seksjonssjef for Naturforvaltning hos Fylkesmannen.
Etter at ein bjørn har drepe minst seks sauer i Isfjorden i Rauma, har Fylkesmannen no gjeve fellingsløyve etter førespurnad frå Rauma kommune.
- LES OGSÅ:
- LES OGSÅ:
– Det er i Rauma kommune der har vore observasjon av mellom anna Statens Naturoppsyn og rådviltkontakt. Etter skadane å døme tyder alt på at det er bjørn, seier Aaram.
Det eine bjørneangrepet skjedde berre 200 meter frå nærmaste hus.
(Saka held fram under bildet)
Fellingslag i Rauma og Nesset
Sauene som er drepe er vaksne, og har blitt funne godt fortært. Det, saman med ein synsobservasjon, har gjort det enkelt å gje fellingsløyve.
– Laurdagskveld blei det observert eit stort, mørkt dyr, jagandes bak ein saueflokk, fortel Aaram.
– Kva er det som skjer no vidare?
– Det som skjer er at det er nedsett ansvarlege fellingsleiarar i både Rauma og Nesset kommune. Så blir det gjeve eit løyve for felling i eit avgrensa område i begge kommunar.
– I Rauma er det Harry Magne Brude som er ansvarleg fellingsleiar, medan Stein Ivar Bjerkli har fått ansvaret i Nesset, opplyser Aaram.
Vidare blir fellingslag oppretta, der dei involverte vil bli orientert.
– Det er viktig at dei har kvalifikasjonane som skal til, i forhold til sikkerheit inn mot skyting av bjørn.
– Det skal eigentleg ikkje vere bjørn i Møre og Romsdal
I tillegg vil Statens Naturoppsyn hjelpe med spesialkompetanse, for å sikre at fellinga blir gjort på ein sikker måte.
Når fellinga vil skje er Aaram usikker på.
– Observasjonane som blei gjort i helga og i går tyder på at kadavera er opp mot éi veke gamle. Så det er ikkje lett å vite kor bjørnen er, den ferdast veldig fort.
– Så vi er avhengige av nye funn. Då kan vi finne opphaldsstaden. Men eg har høyrt rykte om fleire funn i Grødalen i Isfjorden, seier Aaram.
Kva ein bjørn gjer i området, er Fylkesmannen like usikker på som Statens Naturoppsyn.
– Dette er ikkje kjerneområdet til bjørn. Og ifølgje forvaltningsplanen for rovvilt, og differensieringa i forhold til geografi, så skal det eigentleg ikkje vere bjørn i Møre og Romsdal.
Likevel har bjørnen traska seg opp i Romsdalen, og no skal den altså fellast.