Kvinna vart meldt sakna klokka 21:15 laurdag kveld og tidleg sundag morgon vart kvinna funnen død i sjøen ved Ulsteinvik sentrum.
– Klokka 05:20 så vart den sakna funnen omkommen i sjøen i Ulsteinvik. Politiet vurderer obduksjon, men vil presisera at me ikkje har nokon grunn til å mistenka at det har skjedd noko kriminelt, fortel operasjonsleiar Trygve Ødegård ved Sunnmøre politidistrikt til NRK.
- LES ÒG:
Politiet opplyser at dei har varsla dei pårørande til kvinna og at det er der saka står no.
– Ytterlegare etterforskingsskritt må eventuelt bli over helga, seier Ødegård.
– Har politiet nokon tanke om kva som kan ha skjedd?
– Nei, det vil me ikkje spekulera i.
Ikkje frå Ulsteinvik
Den siste kontakten nokon hadde med kvinna var kring klokka 15:00 på ettermiddagen laurdag. Kvinna er ikkje heimehøyrande i Ulsteinvik.
– Me held med varsling av pårørande og me seier ikkje meir enn at det var ei kvinne i 50-åra som var på besøk i Ulsteinvik, seier operasjonsleiar Ødegård.
God hjelp under leiteaksjonen
Politiet seier dei har hadde god bistand av mange etatar under leiteaksjonen laurdag kveld og natt til sundag.
– Me har hatt ute dykkarar frå Ålesund brannvesen, redningsskøyta, Røde Kors har gjort ein flott innsats med båt også. Og me har hatt ute ambulansehelikopteret, seier Ødegård.
Halv fire i natt avslutta dykkarar søket og mannskap frå Røde Kors og redningsskøyta haldt fram med overflatesøk og strandsøk til kvinna vart funnen i hamnebassenget i Ulsteinvik.