Om lag 300 000 nordmenn høyrer på når Magne Grimstad jr. fortel om kampen mot kreftsjukdomen. Det er ei historie om tøffe tak, men også om håp og omsorg.
Stor støtte
– Støtta frå kona mi Birgitte, og frå familie, vener og kjende har vore heilt avgjerande. Det har vore godt å kjenne på så mykje omsorg og omtanke medan eg har vore sjuk. Eg beundrar einslege menneske som må kjempe åleine mot krefta, fortel den 46-årige forretningsmannen og tobarnsfaren til programleiar Kjetil Lillesæter.
Dei siste undersøkjingane frå Aker Universitetssykehus gir Magne Grimstad jr. gode prognosar om å bli heilt frisk. Han fekk konstatert kreft i tarmen og skjoldbrusk-kjertelen i februar 2009, og har vore gjennom fleire cellegiftkurar.
Også positive opplevingar
– Sjukdom er ikkje berre negativt. Eg har kome nærare kona mi, borna mine, familie og vener i den vanskelege tida. Og det har gått opp for meg at livet er kort. Det gjeld å ta vare på dei gode stundene saman med familie, vener og kjende, seier Grimstad som er full av lovord over all støtte han har møtt frå folk i lokalmiljøet.
Intervjuet med Magne Grimstad jr. blir sendt i ”Under samme himmel” på NRK P1, laurdag klokka 07.35.
