Sauenæringa er truga av flåtten. Enkelte bønder har mista opp mot ein tredel av lamma sine. No blir det arbeidd for fullt for å prøve å løyse utfordringane.
Les også:
- Det har vorte verre og verre
I Møre og Romsdal har nesten alle undersøkte sauer i flåttbakteriar på seg.
- Situasjonen har vorte verre og verre. Det har vorte heilt dramatisk dei siste fire fem åra, seier bonde og veterinær Kristin Sørheim i Torjulvågen på Nordmøre.
No blir alle krefter sett inn på å løyse problema. Den farlege flåtten trugar ei heil næring.
- Her har vi teke prøve i over fire år no, og det er 100 prosent av lamma som har vore smitta, fortel Sørheim.
Ho har som mange andre langs kysten opplevd å miste mange dyr dei siste åra.
- Eg veit ikkje om at det er noko anna tapsårsak her enn flåtten. I dei verste åra har vi mista rundt 30 prosent av lamma.
Flåtten er eit rovdyr
Fleire stader denne sommaren skal det testast kor tett flåtten står i terrenget.
Det blir forska mykje, for det er manglande kunnskapar på dette feltet.
- Flåtten utvidar områda sine stadig og utgjer då eit større problemetter kvart som åra går. Flåtten er eit rovdyr i forhold til det at den tek livet av sau, så den er eit like stort problem den som dei andre rovdyra, seier fylkesagronom i Møre og Romsdal, Åshild Melkeraaen.
Våryre sauer og lam trippar rundt, lykkeleg uvitande om at forskarar og styresmakter følgjer dei med argusauge. For bøndene er det umuleg å halde fram med så høge tapstal.
- No får vi sjå om desse tiltaka verkar, og om vi på sikt kjem fram til ei vaksine. Dersom ein ikkje gjer det, så kan ein nesten ikkje drive med sau i dette området, seier Kristin Sørheim.