Politiet fekk melding om 15 - 20 vogntog, som stod fast i Landedalen, og fleire på andre sida.
Korken skal ha vorte starta av eit utanlandsk vogntog som stod fast, og framleis er austgåande felt sperra.
Strøbilar på veg
Strøbilar skulle kome til staden ved 16-tida torsdag, opplyste politiet.
- Bilistar må rekne med ventetid, sa operasjonsleiar Leif Arne Valderhaug ved Sunnmøre politidistrikt like før klokka 16 torsdag ettermiddag.
I vår ettermiddagssending på NRK P1 utdjupa Valderhaug vertilhøva på Ørskogfjellet.
Redusert sikt
- Det vi kan seie er at det er om lag 5-10 meter sikt. Det snør mykje, det er kraftig vind, og det er veldig glatt på vegen, fortel han.
- No er det redusert framkomst over Ørskogfjellet, sa Valderhaug like før 16.30 i dag.
- På eit tidspunkt stod 15-20 vogntog fast, no er det litt betre, legg han til. Likevel er det framleis vogntog som køyrer seg fast på strekninga.
Dårlege dekk
Han oppmodar folk om å vente med å køyre over fjellovergangen om dei har høve til det.
- No er det så dårleg sikt at vi vurderer å setje i gang kolonnekøyring, fortel han.
- Noko av problemet er nok at mange av vogntoga ikkje har gode nok dekk for dette føret, seier Valderhaug. Han trur det kan bli meir problem utover torsdag kveld, og politiet har sendt fleire patruljebilar til området.
Dei har også varsla strøbil, men er ikkje sikker på korleis føret vil utvikle seg utover kvelden.
