Det høyrest skremmande ut – og er det også. I ein ny studie som samanliknar inntak og opphoping av algegifter i blåskjel og østers på same lokalitet, blir det avdekka til dels store avvik. Østersen kan vere full av gift sjølv om blåskjela er friskmelde og etande.
Overraskande resultat
- Det finst 6 hovudgrupper av algegifter. Ein av desse typane kan hope seg enormt opp i østers, sjølv om den ikkje gir særleg utslag på blåskjel, forklarar forskar Lars Johan Naustvoll ved Havforskingsinstituttets stasjon i Flødevigen.
I eitt år har han samanlikna skjelas opptak av ulike algegifter, og er overraska over skilnadane. No skal han forske meir på korleis blåskjel og østers et og fordøyer algar.
Andre skjel i det blå
Korleis er det så med andre populære matskjel, som kamskjel og hjarteskjel?
- Det veit vi ikkje noko om, her må det også forskast for å finne ut når dei er giftfrie og ikkje, seier Naustvoll. Han samarbeider med Mattilsynet, som er ansvarleg for det offisielle blåskjelvarselet.
- Vi håpar det etterkvart blir oppretta eigne giftvarsel for andre matskjel også, så folk unngår å bli forgifta når dei skal nyte havets delikatesser, avsluttar Naustvoll.
