Kárášjoga gielda galgá dustet moaddegoalmmatloht-million kruvnna sturrosaš vuollebáhcaga, ja dan oktavuođas doallá otne liige gielddastivrračoahkkima.
- Gula olles ášši dás:
Ráhkkanan čoahkkinat
Ievttáeahket dolle bellodagat ja joavkkut ráhkkanančoahkkimiid, muhto otná beaivi ferte čájehit nagoda go gielddastivra oažžut eanetlogu seastámušaide maidda livčče dárbu. Várresátnejođiheaddji Solveig Boine Nikkinen gal logai alddis buriid doaivagiid, ovdal čoahkkima ikte.
Sáhttá rievdat geassemánus
Livčče mávssolaš ahte gielddastivra otne sáhtašii soabadit ja dakko bokte olahit eanetlogu daid stuorra seastámušaide.
Gieldda ráđđealmmái, Hilda Vuolab dieđihii ikte NRK Sápmái ahte 22 million kruvnna sturrosaš vuollebáza, mas dál lea sáhka, sáhttá rievdat geassemánus, go dalle čielgá mahká mannanjagi rehketdoallu. Son datge ii lasihan guđe guvlui vuollebáza dalle rievddaš, muhto orru čielggas ahte hástalussan dat šaddá otná čoahkkimii.
Sátnejođiheaddji Anne Toril Eriksen Balto ii ge duostta ovdalgihtii maidiige einnostit.
