Dette er ikkje eit egg

Tryll suppa om til eit egg med hjelp av litt molekylær gastronomi. Vi gir deg oppskrifta og forklaringa.

Video Jordskokksuppe på seng av lakseseviche

Det ser ut som eit egg, men er flytande jordskokksuppe som blir halde på plass av eit tynt gelélag. Klikk på video for å sjå korleis den vart laga.

Synest du suppe er for kjedeleg til å servere gjestene? Då bør du prøve suppeoppskrifta til Noregsmeister i kokkekunst, Ørjan Johannesen.

Med hjelp av eit par ingrediensar som ikkje er vanlege i kjøkenskapet, men som du lett kan få tak i på nettet, kan du forme suppa til eit egg og gi gjestene ei ny matoppleving.

–Den er rett og slett eksplosiv, seier programleiar Hanne Kari Fossum i Schrödingers katt om smaken på den eggforma suppa.

Tang og tare

Den første spesielle ingrediensen du treng er alginat, eit stoff som finst naturleg i tang og tare.

Alginatar er vanlege som tilsetjingsstoff i mat, og er stoffa som skjuler seg bak E-nummera E400-E405.

Alginatar blir brukt som fortjukkingsmiddel i produkt som is, supper, sausar, dressingar, ketsjup og majones.

Den andre ingrediensen du treng er glucopulver, ei blanding av to kalsiumsalt.

Både alginatpulver og glucopulver kan du få kjøpt på nettet, eller i spesielle matbutikkar. Du finn pulvera blant anna i matproduktserien Texturas, som er utvikla av den spanske kokken Ferran Adria som står bak restauranten ElBulli.

Geléhinne

Jordskokksuppe

Ei tynn geléhinne held på plass den flytande jordskokksuppa.

Foto: NRK

Ørjan Johannessen lagar ei suppe som inneheld glucopulver, som han frys i halvkuleformer, og etterpå legg i ein lake av alginat.

Det blir då danna ei gelehinne som kan halde på suppa, sjølv når den smeltar og blir flytande.

Det er møtet mellom kalsiumet i suppa og alginatet i vatnbadet som er hemmelegheita bak gelehinna.

–Alginat dannar spontant gelé ved kontakt med kalsium, fortel forskar Ingvild Johanne Haug ved Institutt for bioteknologi, NTNU, til NRK.no.

Denne evna hos alginat blir nytta mykje i matindustrien til å forme mat slik ein vil.

Haug nemner eit par eksempel på slik "restrukturert" mat:

–Laukringar er mosa lauk som er blanda med alginat og putta i eit kalsiumbad etterpå.

Og paprikaen i paprikafylte oliven, er heller ikkje ordentlege bitar med paprika, men paprikamos som har blitt restruktuert på same måte ved hjelp av alginat og kalsium, avslører Haug.

Kaldkokt laks

Ørjan Johannessen serverer suppa på ei seng av lakseseviche.

Seviche er ein måte å kaldkoke fisk på, ved at sitronsyra i sitronen endrar strukturen i fiskeproteina på omtrent same måte som når vi koker eller steiker fisk.

Oppskrifta på retten får du her:

Jordskokk”suppe” med lakseseviche

Hanne Kari Fossum og Noregsmeister i kokkekunst Ørjan Johannessen

Hanne Kari Fossum i Schrödingers katt og kokk Ørjan Johannessen på Måltidets hus i Stavanger.

Foto: NRK

100 g skrelt jordskokk
1dl mjølk
1dl fløyte
1 dl kyllingkraft
1 ss smør
2 g glucopulver per dl væske

Kok jordskokken mør i væska. Køyr i blendar med smør, smak til med salt og ha i glucopulver. Frys i halvkuleformer.

Alginatlake

5 g alginatpulver
1 l vatn

Køyr alginatpulveret med vatnet. Legg den frosne jordskokksuppa i alginatbadet. Lat det liggje i 3 minutt. Skyl i vatn. No er "suppa" klar for servering.

Jordskokksuppe med lakseseviche

Eggforma jordskokksuppe på ei seng av lakseseviche.

Foto: NRK

Lakseseviche

100 g laksefilet
Saft av ½ sitron

Skjer laksen i tynne skiver, og legg dei i ein djup tallerken. Fordel sitronsafta over lakseskivene, og legg på jordskokksuppe-egget. Finhakk litt vårlauk og strø på toppen.

God appetitt!

Hva skjer med Ikke gjør dette hjemme-huset i den siste episoden denne sesongen? Alle de foregående husene har endt i ett flammehav, så hva skjer denne gangen? Mens sprengstoffekspert Roar og kjemiker Morten slår seg sammen for å prøve å lage vann fra bunnen av, går programlederne Rune og Torfinn vitenskapelig til verks for å undersøke om banning hjelper mot fysisk smerte. (8:8)
Vi er "på nett" så å si hele døgnet. Vi tvittrer, snap'er, spiller, teller skritt, handler og søker etter nyheter. Denne aktiviteten overvåkes av aktører som samler inn enorme datamengder om oss. Det ligger store gevinster, men også viktige fremskritt i BIG DATA! (2:4)
Humor, livsstil og intelligens gir status hos menn - og damer faller for det. Marens gjenværende beilere viser fram nye sider når de skal prøve seg under panseret på en Volvo 240. (5:6)