Vil kutte kostnadane før Stad skipstunnel kan byggast

Det vart ikkje løyvd ei krone til skipstunnelen i regjeringa sitt framlegg til statsbudsjett. Likevel er samferdsleministeren klar på at prosjektet skal realiserast.

• Les også: Kvart skip vil koste samfunnet 26.000 kroner

Men, det er eit stort men:

– Den eksterne kvalitetssikringa viser at kostnadene blir langt høgare enn det Stortinget har sett av i Nasjonal Transportplan til å realisere Stad skipstunnel. Difor må vi jobbe ned kostnadene og få kostnadskontroll, seier Jon Georg Dale (Frp).

Til val på tunnelen

Arbeidet er allereie i gang, og storleiken er noko av det som no skal vurderast. Tunnelen er planlagt å vere kring 1.700 meter lang, 36 meter brei og 50 meter høg. Planane har fått stor merksemd også internasjonalt.

• Les også: Her testar dei korleis det blir å segle i Stad skipstunnel

– Dei store båtane går lengre ut, men mindre fartøy ville hatt eit betre og tryggare tilbod med ein skipstunnel, seier Dale.

Skipsreiar Per Sævik er mellom dei som er skuffa over at Dale kuttar kostnadene og vil ha ein mindre skipstunnel.

– Det er nesten slik at dersom denne tunnelen blir veldig liten, så har det lite føre seg å byggje han. Tunnelen må byggjast så stor at han kan brukast, seier han til nett.no.

Dale, som gjekk til val på å realisere tunnelen, har ikkje gitt opp draumen om den.

• Les også: Regjeringa blar opp 2,7 milliardar til verdas første skipstunnel

– Det handlar korleis du skal binde regionane meir kystnært saman og korleis ein skal utvikle trafikken langs norskekysten forbi Stad, som er meir krevjande og farleg, seier han.

Krev startløyving

Torsdag vedtok eit samla fylkesutval ein uttale der Sogn og Fjordane fylkeskommune krev at Stortinget legg inn 30 millionar kroner til startløyving for Stad skipstunnel i budsjettet for 2019.

– Det er ikkje berre fylkeskommunen som reagerer, vi ser at mange kommunar, politiske parti og styringsgruppa for skipstunnelen reagerer på dette, seier gruppeleiar for Senterpartiet, Sigurd Reksnes.

Start innan 2022

At det ikkje kom midlar i budsjettet for 2019, kommenterer Dale slik:

– Vi ville ikkje begynne på eit prosjekt der kostnadene er langt høgare enn ramma. Difor må vi få ned kostnadene før løyvingane kan kome. Det tilseier at ein også lokalt kan begynne å jobbe med det. Til raskare ein gjer det, til raskare kan ein realisere prosjektet.

Statsråden seier arbeidet med Stad skipstunnel skal ha oppstart seinast innan 2022. Byggjetida er estimert til tre-fire år.

– Det er lagt opp til at ein skal få løyving denne perioden, dersom ein greier å få kostnadskontroll på prosjektet, seier Dale.