– Politiet får ikkje nok pengar til å oppfylle politikarane sine ambisjonar

Dette skjer trass i at Framstegspartiet i regjering har lova å styrke politiet. Hermansen seier politidistrikta må bu seg på å ha mindre pengar enn i fjor.

– Vi har for låge løyvingar i forhold til ambisjonsnivået. Ikkje minst i forhold til det lange etterslepet vi har, spesielt på investeringar i materiell og IKT. Dette er krevjande, og det krev meir midlar, seier han.

Må kutte i allereie tronge budsjett

Politiet bur seg no på at 2016 kan bli eit år med kutt og nedskjeringar. Ifølgje Politiforum må politimeistrane bu seg på å gjere kutt på to prosent av budsjetta.

For sjølv om regjeringa har lova å ruste opp politiet, vil mesteparten av budsjettauken gå med til å dekke inn store planlagde investeringar i til dømes nye datasystem.

Alt no merkast det at politidistrikta har dårleg råd. I Selje i Nordfjord må lensmannen ta drosje om han skal rykkje ut. Politiet i Sogn og Fjordane har rett og slett ikkje råd til nok politibilar.

• Les også: «Nokre av politibilane står så ofte på verkstad at vi snart må betale husleige...»
• Les også: Skjer det ei ulykke, kan ikkje lensmannen rykkje ut – han har ikkje politibil ...

Må snu alle steinar

Politidirektoratet skal snu alle steinar før dei avgjer endeleg om det blir kutt i politidistrikta. Uansett kan ein alt no slå fast at det ikkje er nok pengar, seier Hermansen.

– Heller ikkje på kort sikt er det økonomi i norsk politi til å snu den utviklinga vi har sett med stadig forelding, både i bilparken og på IKT-området.

– Vi har signalisert eit behov for ganske store investeringar på kort sikt for å snu trenden.

– Får nok pengar

Statssekretær i Justisdepartementet, Vidar Brein-Karlsen frå FrP, har ikkje villa kommentere Politidirektoratet sine opplysningar direkte, men sa i går til NRK at dei meiner politiet får nok pengar.

– Politiet er tilført 1,5 milliardar kroner sidan vi tok over regjeringsmakta, og får 2,7 milliardar kroner over budsjettet neste år.

– Eg føreset at politimeistrar og Politidirektoratet er i stand til å utstyre politiet med nødvendige verktøy med dei løyvingane som er, var beskjeden frå Brein-Karlsen.

• Les også: Regjeringa skuldar på politiet - det får opposisjonen til å reagere
• Les også: Politibilkrisa: – Ein heilt uhaldbar situasjon

– Eit spørsmål om ambisjonar

Men når politiet skal prioritere mellom oppgåvene betyr det trongare budsjett for politifolka på bakkeplan, stadfestar Politidirektoratet.

– Årsaka til at vi er i denne situasjonen, trass stor budsjettvekst, knyter seg først og fremst til at veksten i budsjettet er knytt til øyremerkte tiltak som gjer det vanskeleg å omprioritere til andre føremål, seier Hermansen.

– Kor mykje pengar trengst?

– Det er eit vanskeleg spørsmål. Det er like mykje eit spørsmål om kva ambisjonar politikarane har for norsk politi.