Vitne omtalte det som eit gateslag mellom eritrearar i Bergen sentrum laurdag 2. september i fjor.
– Det var surrealistisk og absurd. Eg måtte koma meg vekk. Det var rett og slett farleg å vera der, fortalde Ole Egil Størkson.
Om lag 70 væpna politifolk kjempa for å få kontroll over situasjonen, blant anna med tåregass og sperringar.
Det var dramatiske scener i Bergen sentrum i september i fjor.
24. mai er den eritreiske nasjonaldagen, og laurdag er det planlagt ei ny feiring i Bergen. Samtidig er det varsla ein motdemonstrasjon frå den andre gruppa av eritrearar som er kritiske til arrangørane.
- Bråket i fjor kom ikkje heilt ut av det blå, forklarar Afrika-korrespondent Vegard Tjørhom.
– Konfliktnivået har auka
Det er ei svært djup konflikt mellom dei eritrearane som støttar det sitjande regimet i Eritrea, og dei som høyrer til opposisjonen.
Suraffel Mehari Beyene (27) høyrer til opposisjonen. Han seier at det er usikkert kva som kjem til å skje laurdag, men veit at spenningsnivået er høgare enn nokosinne.
– Det er eit hakk opp sidan september. Vi har forklart politiet og kommunen om vår bekymring. Mange er frustrerte og sinte, seier han.
Ei årsak til at konfliktnivået kan ha auka endå meir, er at ein motstandar av regimet skal ha blitt drepen på ein brutal måte i Tel Aviv for berre to veker sidan. Det er ikkje bekrefta kven som kan ha stått bak drapet.
Beyene håpar politiet tar sitt ansvar og at folk som demonstrerer held seg unna valdsbruk.
- Høyr meir om konflikten i podkasten Oppdatert på NRK.
– Følgjer det frå time til time
Politiet i Bergen følgjer situasjonen tett fram mot arrangementet laurdag, og har justert litt på arbeidsmåten fram mot denne hendinga.
– Med erfaringane frå sist, veit vi at det er eit visst potensial for at det kan koma til valdelege hendingar, seier stabssjef Gustav Landro i Vest politidistrikt.
Gustav Landro er stabssjef i Vest Politidistrikt. Han meiner folk trygt kan opphalda seg i Bergen sentrum laurdag.
Foto: Christine Rieber Lensberg / NRKHan vil ikkje overdriva faren for bråk, men understrekar at mykje kan endra seg fram mot demonstrasjonen. Derfor jobbar dei med å skaffa seg mest mogleg sikker informasjon, til dømes om kor mange tilreisande som er venta til demonstrasjonen.
– Vi overvakar situasjonen med etterretning, frå time til time, for å prøva å føresjå kva som kan koma til å skje, og tilpassar den operative innsatsen deretter, seier Landro.
I fjor nytta dei store ressursar, mellom anna dronar og helikopter.
![](https://mediaorigin.nrk.no/movingstill/eddd313d-4c5a-484b-9d31-3d4c5aa84b09/20230902183603/eddd313d-4c5a-484b-9d31-3d4c5aa84b09_360.jpg)
![](https://mediaorigin.nrk.no/movingstill/eddd313d-4c5a-484b-9d31-3d4c5aa84b09/20230902183603/eddd313d-4c5a-484b-9d31-3d4c5aa84b09_720.jpg)
![](https://mediaorigin.nrk.no/movingstill/eddd313d-4c5a-484b-9d31-3d4c5aa84b09/20230902183603/eddd313d-4c5a-484b-9d31-3d4c5aa84b09_1080.jpg)
![](https://mediaorigin.nrk.no/movingstill/eddd313d-4c5a-484b-9d31-3d4c5aa84b09/20230902183603/eddd313d-4c5a-484b-9d31-3d4c5aa84b09_360.jpg)
![](https://mediaorigin.nrk.no/movingstill/eddd313d-4c5a-484b-9d31-3d4c5aa84b09/20230902183603/eddd313d-4c5a-484b-9d31-3d4c5aa84b09_720.jpg)
![](https://mediaorigin.nrk.no/movingstill/eddd313d-4c5a-484b-9d31-3d4c5aa84b09/20230902183603/eddd313d-4c5a-484b-9d31-3d4c5aa84b09_1080.jpg)
Han seier at folk trygt kan opphalda seg i sentrum, men at dei kan møta på sperringar.
– Dei må vere førebudde på å møta ein del politifolk i området Vågsbunnen og rundt Kong Oscarsgate. Det kjem til å bli litt stengte gater der, seier han.
Avviste tilknyting til regimet
Det har ikkje lukkast NRK å få ein kommentar frå Den eritreiske foreningen i Hordaland, som arrangerer den eritreiske feiringa på laurdag.
I samband med opptøyane i september i fjor avviste styreleiar Hidru Ghebremichael då at dei støtta regimet i Eritrea.
– Vi prøver å halde på vår kultur og vårt språk her. Dette er lov, og det er det gjer vi i dag også, sa han til NRK den gong.
Han hevda då overfor NRK at det var mange blant motdemonstrantane som ikkje var eritrearar.
Trass i opptøyane fekk foreininga til slutt gjennomført feiringa av den eritreiske frigjeringskrigen i fjor, etter å ha blitt bussa til festlokalet i Bergen.
Merknad: Ole Egil Størkson, som var vitne til demonstrasjonen og valden i 2023, er tilsett i NRK.