Frårår å følgje i skatteparadiset sine fotspor

Utgreiinga er klar. Halverer politikarane den kommunale delen av formuesskatten, må tilflyttarar ha med seg totalt 16 milliardar i skattbar formue for at kommunen skal gå i null.

Då vil kommunen få eit tilsvarande skatteinntektsgrunnlag som i dag, skriv Fjordenes Tidende.

– Det vil vere mest umogeleg å få auke i samla skatteinntekter ved tilflytting av innbyggjarar med høg personleg formue, utan at statens inntektssystem til kommunane vert endra, skriv kommunedirektør Åslaug Krogsæter i tilrådinga.

Vil lokke rikingar

Politikarane vedtok utgreiinga etter ein amper debatt i budsjettmøtet før jul i fjor. Idealet er modellen til Bø i Vesterålen, der ein sats på 0,2 prosent lokka fleire rikingar til kommunen.

Å redusere formuesskatten frå 0,7 til 0,35 prosent i Stad, trur Hogne Bleie i Frp at det vert lettare å lokke rike vestlendingar til nordfjordkommunen.

Det synet står han på når saka kjem opp i torsdagens formannskapsmøte. Inntektene kan gi distriktskommunen sårt trengde pengar til tenestetilbodet.

– Ei skattbar formue på 16 milliardar kroner høyrest mykje ut, men til dømes er det eigarane av to familieeigde lakseoppdrettsfirma, seier Bleie.

Ikkje mange rikingar å lokke

– Det er ikkje så mange i Noreg som har over milliarden i formue, det seier professor emeritus i skatterett Ole Gjems-Onstad.

Han syner til at det var nokre som melde flytting til Bø, men at det var mange som etter kvart gav opp forsøket.

– Det er ikkje berre å melde flytting, du må også gjennomføre ei reell flytting.

Gjems-Onstad meiner også at med dagens regjeringa vil det vere ein risikosport for kommunar som vil slå seg opp som skatteparadis.

– Sjølv om ein skulle ha sympati for eit ynskje om å redusere den særnorske formuesskatt, så er det likevel makta som råd. Venstresida har null sympati for slike forsøk på kommunale særordningar.

Meir å vinne, enn å tape

Men i Stad vil ikkje Frp-politikar Hogen Bleie gi opp kampen og syner blant anna til ringverknadane av ei slik tilflytting, i form av innbyggjarar og sjansane for anna verksemd som igjen kan løyse ut tilflytting og skatteinntekter til kommunen.

Bleie meiner politikarane bør ta risikoen med å justere skatten, sjølv om dei kan tape inntektsutjamning frå staten medan dei ventar på rike tilflyttarar.

I fjor fekk Stad 53,8 millionar kroner i inntektsutjamning.

Med allereie låg snittleg og total formue i Stad, meiner Bleie at Stad har meir å vinne, enn å tape.

– Inntektskjelda frå formuesskatten er låg. Kjem ein eller to tilflyttar med høg formue, så går ein i pluss. Er vi riktig heldige, og får ein person med til dømes 100 milliardar, så gir det kommunen 35 millionar i skatteinntekt, seier han.

– Det ville stilt seg annleis om Stad hadde mange innbyggjarar med høg formue. Då ville sjansespelet vore større, legg Bleie til.

Men professoren i skatterett meiner sjansane er små.

– Vi snakkar kanskje om eit titals personar i Noreg som har over 2 milliardar i formue. I tillegg har dei aller rikaste personane i Noreg allereie flytta til utlandet, seier Gjems-Onstad.

Venstre har snudd

Venstre stod saman med Frp og KrF bak ynskje om å greie ut kor vidt også Stad skulle satse på å verte skatteparadis. Rapporten etter utgreiinga gjer at Venstre har mista lysta på å gå vidare med saka.

– Den rapporten er vel ganske eintydig på at dette ikkje vil løne seg for Stad kommune, så Venstre si gruppe er ikkje klare for å gå for dette no, seier ordførar Gunnar Silden (V).

Dermed er det heller ikkje lenger fleirtal for draumen om skatteparadiset på vestkysten.