– Utruleg spennande og fascinerande. Eg sitrar nærmast, ler Johan Giertsen.
Til vanleg er han jusprofessor ved Universitetet i Bergen. Men når det nærmar seg val vert han travel også på andre frontar.
For Giertsen er nemleg valkampen julaftan og 17. mai på ein gong. Mellom bunkar av papir og lovbøker finn han tid til å studera meiningsmålingar.
– Kombinasjonen av politikk og tal har alltid fascinert meg, heilt sidan eg var liten gutunge. Då sat eg med reknestav og lagde mine egne prognosar basert på NRK sine sendingar, minnast Giertsen.
Samlar inn resultat
Det har han tatt vidare. No nyttar han datamaskina til å samle resultat av alle målingar som vert gjort. Resultata lastar han inn på nettsida «Poll of polls».
– Vi legg inn alle partimålingar i Noreg. Og på landsmålingane så reknar vi ut snittet av målingar i bestemte periodar, forklarar han ivrig.
På den måten finn Giertsen svaret på korleis folk ville ha stemt om det var valdag i dag.
– Eg tykkjer det mykje tryggare å sjå på tal som er komne. Det å spå er så usikkert. Kven veit kva som skjer frå torsdag til måndag?
– Spennande kven som er størst
Som Høgre-mann gler han seg over framgangen deira. Men enno kan mykje skje.
– Det er mest spennande er jo kven som blir største parti. Det er uvisst kven som er størst på måndag. Det er spesielt, for ingen nolevande nordmenn har opplevd eit anna parti som det største enn Arbeidarpartiet.
- LES OGSÅ:
Måndag er det stortingsval, men om ikkje lenge er det på igjen for Giertsen. For om to år er det kommuneval.
– Allereie i haust byrjar vi og dei første tala kjem til våren. Det går i eitt og det er veldig gøy, avsluttar Giertsen.