Macron fekk tre minutt ståande applaus då han kom til den amerikanske Kongressen onsdag. Han heldt talen til dei folkevalde på engelsk.
I talen understreka Macron kor viktig det er å ta vare på miljøet.
– Ingen «planet B»
– Vi har ingen «planet B», sa Macron.
– Vi drep planeten dersom vi held fram med å forureine verdshava, dersom vi ikkje reduserer utsleppa av CO₂ og dersom vi øydelegg det biologiske mangfaldet, sa Macron.
Han sa at det er nødvendig å omstille seg til ei framtid med lågare utslepp av klimagassar.
– Vi må samarbeide med næringslivsleiarar og med ulike lokalsamfunn for å gjere planeten vår storarta igjen.
Macron brukte dermed ordlyden frå president Donald Trump sitt slagord i valkampen, om å gjere USA «great again».
– USA blir med igjen
Macron kom også inn på USA sitt forhold til Parisavtalen, ein avtale som blei signert under klimatoppmøtet i Paris i 2015. Hovudmålet med avtalen er å bremse den menneskeskapte globale oppvarminga.
Trump annonserte i fjor at han vil trekkje USA frå denne avtalen. Men Macron trur at USA vil snu.
– USA kjem til å bli ein del av denne avtalen igjen, det er eg heilt sikker på, sa Macron.
I talen til Kongressen understreka presidenten også kor viktig det tette forholdet mellom USA og Frankrike er, og sa at dei to landa må stå saman i arbeidet for å løyse dei store internasjonale utfordringane.
Han oppfordra også USA til å spele ei aktiv rolle i internasjonalt samarbeid om ei lang rekkje saker.
– Det er to vegar vi kan velje. Vi kan velge isolasjonisme, tilbaketrekking og nasjonalisme. Men å sengje døra til verda vil ikkje stanse utviklinga i verda, sa Macron.
Breiare internasjonalt samarbeid
– Verdssamfunnet må styrkje innsatsen og byggje ein verdsorden for det 21. hundreåret, sa han.
- Les også:
Iran-avtalen om atomvåpen var også eit tema.
– Iran må aldri bli i stand til å kunne bruke atomvåpen, sa Macron.
Emmanuel Macron starta statsbesøket i USA måndag kveld. Han er den første utanlandske statsleiaren som har komme på statsbesøk til USA etter at Donald Trump blei president.