Som ein liberal EU-tilhengar i eit «Europa i motvind» er Macron oppteken av å unngå å hamne i same fella som britane sin tidlegare statsminister David Cameron og resten av britane som ville at Storbritannia skulle bli i EU. Han vil unngå dette ved å vere klar og tydeleg på det han står for, skriv The Guardian.
– Akkurat no, der dei ekstreme og dei som er mot globalisering vinn val, trur eg at det er den rette tida for Frankrike å bestemme seg for å gå i motsett retning, sa Macron då han tysdag besøkte London.
- Les også:
Vil lære franskmenn å prøve og feile
Skjebnen til dei over 300.000 franske statsborgarane som bur i Storbritannia etter at Brexit trer i kraft var eit av fleire tema som blei diskutert då Macron møtte statsminister Theresa May til samtalar i Downing Street 10.
Og sjølv om presidentkandidaten uttalte at han ønsker at britane skal få eit rettferdig Brexit, er det liten tvil om kva han meiner om at britane forlèt EU, og var ikkje nådig då han etter visitten i Downing Street talte til sine mange landsmenn som bur i finansbyen.
Han oppfordra dei til å kome tilbake til heimlandet for å drive innovasjon, utforske, undervise, skriv Le Point.
– Eg vil at vi skal vere eit land der ein kan gjere alt dette.
I Frankrike er det ikkje rom for å feile, men heller ikkje for å lukkast skikkeleg, resonnerte han vidare for eit publikum av entreprenørar og finansfolk – dei fleste Macron-tilhengarar. Han er redd det han meiner er ei fransk frykt for å feile gjer at franskmennene som vil satse reiser utanlands.
Ein valkamp der det meste ligg ope
Eit besøk i Downing Street 10 seier ein del om kor langt han som har blitt rekna som eit friskt pust i valkampen har kome. The Guardian meiner dette viser kor seriøst den britiske regjeringa tek ein mogleg sentrumssiger i valet i mai, sjølv om ein visitt hos den britiske statsministeren slett ikkje er uvanleg for franske presidentkandidatar.
Ein som derimot ikkje får audiens hos May er Marine Le Pen, kandidaten på yttarste høgre. Ifølge ein talsmann for Downing Street er det offisiell policy for den britiske regjeringa å ikkje ha noko å gjere med Le Pen sitt parti Nasjonal Front.
Der presidentvervet vanlegvis har veksla mellom sosialistpartiet og dei konservativt ser mykje ut til å bli annleis i år. Både til høgre og venstre har utradisjonelle kandidatar segla fram. Men der sosialistpartiet lir av regjeringsslitasje etter fem år med tidenes mest upopulære president, er konservative François Fillon i hardt ver etter at han blei skulda for å ha lønna fleire familiemedlemmer for arbeid det kan sjå ut som dei ikkje har gjort.
Nyleg har også uavhengige Macron fått gjennomgå i media, med alt frå rykte om eit utanomekteskapeleg forhold til det som blei oppfatta som kontroversielle fråsegner om Frankrikes kolonifortid då han førre veke besøkte Algerie.
Ifølge dei siste meiningsmålingane ligg Macron tilnærma likt med François Fillon bak Marine Le Pen i første omgang, som finn stad 23. april.
- Les også:
- Les også: