Saka har forgreiningar til Belgia, Frankrike, Italia, Portugal, Romania, Sveits og Storbritannia. 65 personar er arresterte i Spania, og dei er sikta for blant anna dyremishandling, dokumentfalsk, å hindre politiet si etterforsking, kvitvasking av pengar og for brotsverk mot folkehelsa.
Det er uklart om noko av kjøtet kan ha hamna i Skandinavia.
«Operasjon Gazel»
Saka ser ut til å ha band til eit beslag som irske styresmakter gjorde i 2013 av hamburgerkjøtdeig som inneheldt hestekjøt. Det leidde til etterforsking, og ein nederlandsk statsborgar vart identifisert som sentral i saka.
Politiet greidde ikkje då å finne ut kvar han oppheldt seg.
Ein etterforskar i Guardia Civil på eit illegalt slakteri i Spania.
Foto: EuropolSommaren 2016 sette Guardia Civil i Spania verk «Operasjon Gazel», etter mistanke om at det gjekk føre seg ulovlege forhold i hestekjøtmarknaden. Under denne etterforskinga kom det fram at ein liga har brukt hestekjøt som tydeleg har vore stempla som «ikkje eigna til menneskemat».
Hestane som vart slakta i to ulike slakteri i Spania kom frå det nordlege Spania og Portugal. Kjøtet vart prosessert ved eit spesielt anlegg i Spania, før det vart sendt vidare til Belgia. Belgia er største eksportør av hestekjøt i Europa.
Samordna aksjon
Under etterforskinga greidde Guardia Civil å finne den nederlandske statsborgaren som var mistenkt i Irland i 2013. Han heldt til i feriebyen Calpe på Costa Blanca. Herfrå meiner politiet han har styrt heile organisasjonen.
Denne gamle og sjuke hesten fann Guardia Civil i ein stall som leverte hestar til det illegale slakteriet.
Foto: EuropolHan vart arrestert under ei reise i Belgia i ein samordna aksjon mellom belgisk politi, det belgiske mattilsynet og Guardia Civil. Samstundes gjekk politiet til aksjon i Frankrike, Portugal, Italia, Romania, Sveits og Storbritannia.
Til saman 66 personar er fengsla eller under etterforsking etter aksjonen.
