Sjukehuset er det nest største sjukehuset på Gazastripa. Den siste tida har tusenvis av flyktningar søkt tilflukt der for å sleppe unna israelske soldatar.
Kampane i nærleiken har isolert sjukehuset og skal ha ført til at fleire pasientar har døydd, ifølge helsestyresmaktene.
Israel har varsla ein bakkeoperasjon i byen, og har bede folk evakuere sjukehuset. Dei opna nyleg ein korridor som skulle gjere det trygt for flyktningane å ta seg vidare sørover i Gaza.
Det rår panikk inne og utanfor sjukehuset, fortel ein lege til nyhetsbyrået AP.
– Situasjonen blir verre og verre kvar time og kvart minutt, seier kirurg Khaled Alserr som har operert pasientar med skotskadar på sjukehuset.
Fleire hundre palestinarar forlèt sjukehuset onsdag, melder New York Times.
87 menneske er drepne de siste 24 timane, opplyser helsestyresmaktene i Gaza, som er styrt av Hamas.
Meiner gislar blir gøymde
Torsdag morgon storma israelske spesialsoldatar sjukehuset. Det stadfestar forsvaret i Israel (IDF). Dei seier dei har fått opplysningar frå truverdige kjelder om at Hamas skjuler gislar inne på sjukehuset.
– Fordi det er sannsynleg at Hamas-terroristar gøymer seg bak skadde sivile inne på Nasser-sjukehuset akkurat no. Difor gjennomfører IDF ein presis og avgrensa operasjon inne på Nasser-sjukehuset, seier IDF-talsperson Daniel Hagari i ei videomelding.
Han seier målet med operasjonen er å sikre at Nasser-sjukehuset held fram med å behandle pasientar i Gaza, og at dei har koordinert sendingar med medisinsk utstyr til sjukehuset.
– Vårt mål er å jakte Hamas-terroristane der dei måtte gøyme seg, seier Hagari.
Hamas avviser at dei gøymer krigarar i sjukehuset, og kallar skuldingar løgner, melder Reuters.
Også då IDF gjekk inn i sjukehus i Gaza by før jul, sa dei grunnen var at Hamas gøymde seg inne på sjukehusa.
Skaut med dronar
Talsmann for helsestyresmaktene i Gaza, Ashraf al-Qudra, seier til NRK at IDF gjekk inn med stor styrke torsdag morgon.
Dei fjerna telta til flyktningar og gjekk til angrep på akuttmottaket då dei tok seg inn på sjukehusområdet.
– Dei skyt med dronar for å skremme flyktningane. I dag tidleg blei operasjonsavdelinga bomba, som førte til at ein pasient blei drepen. Fleire blei skadde.
To ambulansar blei øydelagde i angrepet, og operasjonsromma og fødeavdelinga er evakuert. Al-Qudra seier at det er seks pasientar som treng pustemaskin, i tillegg til tre kuvøsebarn som treng hjelp.
– Situasjonen er katastrofal. Det er veldig farleg. Eg er uroa for helsepersonell og pasientar som er inne på sjukehuset. Vi ber alle internasjonale organisasjonar og den norske regjeringa om å hjelpe sjukehuset og dei som er der inne.
Ber Israel stoppe angrepet
Organisasjonen Leger uten grenser hadde fleire tilsette inne på sjukehuset då angrepet starta torsdag morgon. Dei ber Israel stoppe angrepet fordi det set liva til både medisinsk personell og pasientar i fare.
– Våre tilsette måtte flykte frå sjukehuset, medan pasientane blei verande att inne, skriv dei.
Ein av dei tilsette blei gripen i ein israelsk kontrollpost på veg ut frå sjukehuset, medan ein annan ikkje er gjort greie for.
Dei skriv at situasjonen er kaotisk, og at det er uvisst kor mange som er døde og såra i angrepet.
WHO uroa for situasjonen
Verdshelseorganisasjonen (WHO) seier Nasser-sjukehuset er eit viktig sjukehus for heile Gaza no, fordi dei fleste av sjukehusa er øydelagde i krigen, melder AFP.
WHO-sjef Tedros Adhanom Ghebreyesus sa onsdag at han er uroa over dei meldingane som har kome om sjukehuset, som då var omringa av israelske soldatar.
Han sa sjukehuset var ryggrada til helsesystemet i Sør-Gaza, og var kritisk til at WHO var nekta tilgang til sjukehuset, og hadde mista kontakten med dei tilsette der.