Minst 80 vart skadde i skotvekslinga, fortel doktorar ved sjukehusa i Sanaa til nyheitsbyrået Reuters. For fire av dei skadde er tilstanden kritisk.
Jemenittisk politi og sivilkledde regjeringsstyrkar opna tysdag eld i hovudstaden, i forsøk på å hindra folk i å slutta seg til dei fleire tusen demonstrantane som i fleire veker har heldt til utanfor universitetet i Sanaa.
Det statlege nyheitsbyrået Saba hevdar derimot at det er ein av dei mange klanane i landet som står bak skyteepisoden, og opplyser at tre demonstrantar og tre politimenn vart skadde i samanstøytane tysdag.
Ifølgje Saba leitar styresmaktene etter dei skuldige, og vil bringa dei for retten.
30 drepne
Ifølgje Reuters er om lag 30 menneske drepne i Jemen etter at opprøret mot president Ali Abdullah Saleh starta i midten av februar, inspirert av revoulsjonane i Tunisia og i Egypt.
Demonstrantane krev at Saleh går av etter å ha sete i presidentstolen i 32 år. Regjeringa har varsla reformar i håp om å dempa krava frå regimemotstandarane, men misnøyen er framleis sterk i Jemen, som er det fattigaste landet på den arabiske halvøya