Bloomberg går inn for skjerpt våpenkontroll i USA

Like ved åstaden for ei av dei verste masseskytingane i Colorado gjekk New York-milliardær Bloomberg ut med bodskap sin torsdag. Han vil forby spesielle typar angrepsrifler, innføre lisens for våpenkjøparar og at Det kvite huset skal innta ei heilt ny rolle i korleis vald med skytevåpen skal motverkast.

• Vil du ha ukesbrevet til Urix? Klikk her

– Eg har vore dedikert i kampen mot skytevåpen i 15 år, sa 77-årige Bloomberg.

– Som president vil eg arbeide for å få ein slutt på epidemien av vald utført med skytevåpen ein gong for alle, sa den tidlegare New York-ordføraren.

Han lanserte ei lang liste med tiltak for å få kontroll på våpensalet i USA.

Utspelet torsdag kom under eit lukka møte i byen Aurora i Colorado, der han møtte overlevande etter masseskytinga i 2012. Då vart 12 personar drepne og nesten 60 såra inne i ein kino i byen.

• Holmes får livsvarig fengsel for Batman-massakre

– Eg lovar at eg aldri skal gje opp denne kampen. Det er ein slik president dette landet treng og fortener, sa Bloomberg til tilhøyrarane.

Bloombergs påmelding i kampen om å bli Demokratane sin kandidat mot Donald Trump ved presidentvalet neste år, har vorte møtt med skepsis frå fleire hald. Med massive reklamekampanjar på TV har milliardæren og den tidlegare republikanaren vorte skulda av konkurrentane Bernie Sanders og Elizabeth Warren for at han prøver å kjøpe valet.