Amerikansk mafiatopp arrestert i samordna aksjon på Sicilia

FBI trekkjer fram særleg Thomas Gambino, som dei meiner er ein av toppane i Gambino-familien i New York. Dei trur han var på Sicilia for å hjelpe til med å byggje opp igjen makta til Inzerillo-klanen i den sicilianske mafiaen Cosa Nostra.

Han var ein av dei arresterte i aksjonen natt til onsdag, der over 200 politifolk deltok.

Inzerillo-klanen tapte kampen om makta i Cosa Nostra på 1980-talet, då Salvatore «Udyret» Riina tok full kontroll over organisasjonen. Mange i Inzerillo-familien vart drepne i striden mot Riina og resten av Corleone-klanen, medan ein del av dei valde å stikke av til USA.

Tilbake til Sicilia

Det gjaldt blant andre søskenbarna Tommaso og Francesco Inzerillo. Dei reiste tilbake til Sicilia tidleg på 2000-talet, truleg med hjelp nettopp frå den mektige Gambino-familien i New York.

Det var forsmedeleg for den ein gong så mektige Inzerillo-familien i Palermo å miste makta til ein gjeng tidlegare sauetjuvar frå landsbyen Corleone. Leiaren for familien, Salvatore Inzerillo, vart skoten og drepen av Riinas folk i 1981. Det bana vegen til toppen for «Udyret».

Corleone vart verdskjend gjennom romanen «Gudfaren» av Mario Puzo og dei tre filmane som er baserte på boka.

Italiensk politi meiner at Inzerillo-klanen lenge har prøvd å ta tilbake makta dei ein gong hadde i Palermo på Sicilia, og dei trur at samarbeidet med Gambino-klanen den siste tida har vore eit forsøk på å reise seg igjen.

Maktvakuum i Cosa Nostra

Med både Salvatore «Udyret» Riina og etterfølgjaren Bernardo «Traktoren» Provenzano borte, begge døydde i fengselet, har det dei siste par åra vore eit maktvakuum i Cosa Nostra. Italiensk politi har arrestert fleire sannsynlege etterfølgjarar, og dei har intensivert jakta på dei som enno er på frifot.

Det er truleg dette maktvakuumet Inzerillo-familien har hatt ambisjonar om å fylle i samarbeid med Gambino-familien i New York. FBI og det italienske politiet har også gitt den samordna etterforskinga kodenamnet «New Connection» (Ny kontakt).

Politiet har lenge overvaka fleire sentrale aktørar i forsøket på å atterreise Inzerilloane si makt. Dei opplyser at dei blant anna filma Thomas Gambino då han hadde eit hemmeleg møte med leiaren for Inzerillo-familien om bord i ein gummiflåte utanfor kysten av Palermo i fjor sommar

Politiet slår til mot ungdomen i Cosa Nostra

– Framleis taparar

Det var ein godt fornøgd Renato Cortese, politisjef i Palermo, som snakka med journalistar i byen onsdag. Han brukte uttrykket flyktningar om dei frå Inzerillo-familien som reiste til USA under borgarkrigen i Cosa Nostra.

– Dette var taparane som stakk av til USA for å ikkje å bli drepne av Riina og Corleone-gjengen. Vi kan slå fast at dei framleis er taparar, sa han blant anna.

Alle dei arresterte er sikta for medlemskap i mafiaen, alvorleg pengeutpressing og svindel.

Alle dei arresterte er sikta for medlemskap i mafiaen, alvorleg pengeutpressing og svindel.