Dei drepne var islamistiske militante som hadde teke kontroll over byen Zinjibar i den sørlege Abyan-provinsen, ifølgje det jemenittiske forsvarsdepartementet.
Regjeringsstyrkane skal også ha teke av dage ein lokal Al Qaida-topp, ifølgje nyheitsbyrået Reuters.
Dei militante opprørarane skal ha teke styringa i Zinjibar for ti dagar sidan. Sidan det har det gått føre seg harde kampar mellom jemenittiske styrkar og opprørarane.
- LES OGSÅ: Flere døde etter sammenstøt i Abyan
På randen av borgarkrig
Den arabiske republikken Jemen har vore prega av konflikt mellom stammar og klanar og mellom konservative og radikale heilt sidan samanslåinga av Nord-Jemen og Sør-Jemen til ein stat i 1990.
Dei siste fire månadene har det vore demonstrasjonar og opptøyar i fleire byar i Jemen.
Landet var på randen av borgarkrig då det søndag blei inngått ei mellombels våpenkvile mellom regjeringsstyrkane i Jemen og ein av dei store stammane i landet.
Kampane held likevel fram. Seinast natt til i dag skal 19 personar ha vorte drepne i valdelege samanstøytar.