– Handlevogner har jo flydd med både ungar og matvarer i alle år.
Det seier Tanja Munkeby som er på veg inn for å handle på matbutikken på Åsen i Levanger.
Men det er ikkje ein vanleg butikk. Han er den skeivaste butikken i landet.
Det er 70 centimeter forskjell på det nedste og det øvste hjørnet, og det merkast godt.
– Ein må jo berre ta omsyn til det når ein sit frå seg handlevogna, så ho ikkje hamnar på lageret, seier Morten Hammerhaug.
No kan det vere butikken må rivast, til fordel for ein bein butikk.
– Det kan jo bli bra å få eit nytt bygg med eit flatt golv, legg han til.
Mange blir svimmel
Huset var fyrst meieri og golvet skulle ha ei viss helling.
Men etter kvart har leirgrunnen under bygget sige og butikken har blitt enno skeivare.
– Det er mange som blir svimmel og uvel fyrste gong dei går inn her, seier Munkeby.
Kundane har blitt vand med å sette handlevognene inntil frysedisken, kjøleskap og reolar.
Men både kundar og tilsette synest det er heilt greitt at den skeive butikken blir erstatta med ein ny.
– Det skal gå bra å gå på eit flatt golv også, seier Hammerhaug, som ikkje kjem til å sakne det skeive golvet.
Vil bygge nytt
– Det har lenge vore eit stort ønske frå både tilsette og medlemmar om å kome i gang med bygginga av ny butikk.
Det seier administrerande direktør Torbjørn Skei i Coop Midt-Noreg til Trønder-Avisa.
Coop Midt-Noreg vil rive butikken i Åsen, skriv Trønder-Avisa.
– Ønske vårt er å rive eksisterande butikk og bygge nytt, seier Skei til avisa.
Det skeive golvet gjer det utfordrande for tilsette å gjere jobben sin.
No har Coop Midt-Noreg vore i møte med Levanger kommune for å finne ut om det er mogeleg å begynne å bygge ny butikk.
Men det er framleis uklart når ny butikk er på plass.
Sjå heile episoden frå Norsk Attraksjon her:
I ein tidlegare versjon av denne saka stod det at det var ein Coop Prix butikk, men i 2015 blei han utvida og omgjort til Coop Extra.