– Dei har hatt flaks. Dette er ein potensielt dødeleg situasjon, seier operasjonsleiar Trond Volden i Trøndelag politidistrikt.
Politiet fekk melding om hendinga kl. 14.
– Det var eit turfølge på seks personar. Tre av dei var tekne av skredet, medan dei andre tre sto igjen på toppen av fjellsida, opplyser Volden.
Følgde skredet med blikket – redda ut kameraten
Desse personane klarte å følge med på vennane som vart tekne av skredet, og visste derfor om lag kor dei skulle begynne å grave.
– Dei gjorde alt riktig ved å følge med på kor dei forsvann, seier politiet.
Den eine av dei tre skal ha blitt gravd ned av snømassane. Dei andre skiløparane iverksette umiddelbart kameratredning.
– Personen som var begravd vart funnen om lag ein halv meter under snøen, opplyser Volden.
Alle tre vart redda ut av resten av turfølget, og er no i god behald. Ingen har blitt skadde. Dei fekk ikkje bistand frå hjelpemannskap, men varsla politiet om hendinga sjølv.
Åtvarar mot skredfare i fjellet
Hovudredningssentralen har varsla politiet om høg snøskredfare.
- Snøskredfare i din region?
Politiet åtvarar mot skredfare i fjellet, og ber alle som ferdast i slike område om å vere ekstra på vakt. Dette gjeld også andre stadar i Trøndelag.
– Flaks kombinert med dyktigheit og erfaring, gjorde at det gjekk bra denne gongen, avsluttar Volden.