I september blei det kjent at svenske Foxtrot stod bak kidnapping og utpressing knytt til artist i Trondheim natt til 9. mai.
Samstundes bekrefta Kripos at Foxtrot-nettverket opererer fleire stader i Noreg. I tillegg var det var kaos i gjengmiljøet i Sverige.
Men allereie i mai mistenkte politiet i Trøndelag at utpressinga kunne knytast til det kriminelle nettverket.
– Det har vore ein del av etterforskinga frå starten, seier politifagleg etterforskingsleiar Øyvind Jørgensen i Trøndelag politidistrikt.
Då tok dei kontakt med politiet i Sverige for å koordinere pågripingar i saka.
Koordinert pågriping i Noreg og Sverige
Politiet i Trøndelag hadde planlagt å aksjonere mot dei sikta i saka simultant og ville koordinere dette med aksjonane i Sverige.
– Me ønska å pågripe fleire personar i Noreg og i Sverige på ganske likt tidspunkt, forklarar Jørgensen.
Øyvind Jørgensen i Trøndelag politidistrikt er politifagleg etterforskingsleiar i saka.
Foto: Jøte Toftaker / NRK– Det var taktiske omsyn om låg bak desse vurderingane.
I ei oppmoding frå politiet i Trøndelag, datert 1. juni, blir svensk politi bedd om å ransake huset til ein svensk mann.
Mannen er sikta for organisert grovt ran og har sete i varetekt sidan han blei utlevert frå Sverige i mai.
I tillegg ber politiet i Noreg om at det blir gjort beslag av vedkommande sin telefon, datamaskin, nettbrett og liknande.
Dette meinte politiet i Trøndelag at hasta å gjere.
Aksjonane innebar å pågripe dei involverte, ransaking av stadar dei sikta disponerer og av digitale einingar.
Kidnapping og grovt ran
I alt er seks personar sikta for grovt ran av den trønderske artisten. Ytterlegare ein person er sikta for heleri og kvitvasking i forbindelse med ranet.
Artisten blei utpressa og har betalt ein betydeleg sum pengar til ein tredjemann, står det i oppmodinga. Dei sikta vil bli stilt for retten i april.
I tillegg er fire personar tiltalt for å ha bortført sonen til artisten i nokre timar i Trondheim i vår. Dei er også tiltalt for medverknad til ran av artisten.
Rettssaka mot dei fire startar i Trøndelag Tingrett måndag 11. desember.
Ekstra sikkerheitstiltak i rettssaka
Det er bestemt at skal vere ekstra sikkerheitstiltak under rettssaka.
Personar som er straffedømt dei siste fem åra får ikkje kome inn i rettssalen. I tillegg må alle som får kome inn i rettssalen gå gjennom ein metalldetektor, liknande sikkerheitskontrollen på ein flyplass.
Rettssaka skal også gå for lukka dører.
– Det er ikkje noko hemmelegheit at det er på grunn av knytinga til Foxtrot-nettverket, seier Jørgensen.
Han forklarar at det ikkje er uvanleg med ekstra sikkerheitstiltak og at politiet er til stades i rettssaker. Samstundes påpeiker han at dette har vore ei prioritert sak for politiet i Trøndelag.
– Dette har vore ein sak som har vore viktig å prioritere, nettopp på grunn av knytinga til organiserte kriminelle nettverk. Me ønsker å forhindre at dei opererer i vårt distrikt.
URIX 27. september: Rawa Majid, kalla den kurdiske reven, er ein av Sveriges mest ettersøkte gjengleiarar. Nettverket hans koplast til fleire drap og eksplosjonar i Sverige den siste tida. Kven er han og korleis jobbar han?