– Dette er heilt ekstremt. Eg jobbar sjølv i eit byrå og hadde aldri sendt ein sånn e-post, seier Stine Næss-Hartmann.
21. september vart ho og fleire andre influensarar kontakta av pressebyrået til Old El Paso, Släger, om ei moglegheit for å lage ei reklame for dei.
Det vi ønsker fra deg er innlegg i dine sosiale kanaler (det vil bli spesifisert i kontrakten hvor mange) hvor du deler #mintacorekkefølge med følgerne dine.
Det går kort forklart ut på at du handler inn de ingrediensene du bruker når du lager taco, og lager din favoritt-taco.
Her er det viktig at du trekker frem de tingene som er viktig for deg.
Har du en guilty pleasure? MÅ du ha ingrediensene i en spesifikk rekkefølge? Dette lager du så innlegg av som du deler med dine følgere.
Pressebyrået Släger ynskja at ho og fleire skulle lage innhald på sine profilar der dei viser fram kva dei liker å ha på tacoen sin. Men seinare i mailen, der dei skriv kva dei kan tilby influensarane for arbeidet, skriv dei at dei ikkje har eit budsjett til å betale for å vera med på prosjektet.
– Det er både synd og trist. Skal eg liksom få eit gåvekort på å kjøpa nokre tacoskjell, som eg så må skatte av etterpå? Det heng ikkje på greip.
– Tacoskjell betaler ikkje lånet mitt, seier Næss-Hartmann til Nettavisen, som var fyrst ute med denne saka.
Fortalde på TikTok
Næss-Hartmann la så ut ein video på TikTok der ho las opp innhaldet i e-posten. Denne har fått fleire kommentarar frå folk som også reagerer på det same.
– Takk, men nei takk. Eg synest det er utruleg synd at ei såpass stor merkevare som Old El Paso ikkje har moglegheit til å betale folk for ein jobb, når ein faktisk veit at det er store influensarar som får betalt, seier ho i videoen.
Etter at TikTok-videoen fekk ein del merksemd skal PR-byrået ha hatt eit ynskje om at Næss-Hartmann skulle slette videoen, i ein telefonsamtale. NRK har spurt Släger om dette, men dei har valt å ikkje svare.
Fleire reagerer
Fleire har reagert etter at ho la ut desse videoane. Og i kommentarfeltet skriv fleire at dei har opplevd liknande i sine bransjar.
«Eg er interiørarkitekt, og du ville blitt overraska over kor mange som trur og forventar at mine tenester er gratis.»
«Fekk bestilling på ei kake ein gong. Betalinga var at eg fekk vera med på festen.»
Fleire større profilar har og slengt seg på.
Sindre Svines eller @plantegutt var ein av dei som fekk e-post av Släger, og som sa nei til samarbeidet.
– Eg vart fyrst veldig sint og oppgitt. Synes det er ein uting å be influensarar, same kor store, om å gjera arbeid for produkt.
– Er det så farleg?
Men ikkje alle er einige i at dette er eit stort problem.
Influensar Sebastian Solberg skriv i kommentarfeltet på Næss-Hartmann sin instagramvideo at han meiner det er nok å berre sei nei, viss ein ikkje får eit godt nok tilbod.
Skulle ikkje fått den mailen
– Denne mailen skulle aldri vore sendt, og det skulle aldri vore kommunisert ei forventing til nokon om å gjera gratisarbeid, skriv Eirik Øiestad frå PR-byrået Släger i ein e-post.
Han seier at alle som gjer eit arbeid for dei burde få betalt for dette, og at dei aldri har opplevd ei sak som dette i løpet av sine 16 år som PR-byrå.
– Det er menneskeleg å feile, slik me har gjort i dette tilfellet, men me må og lære noko av feilen me har gjort her. Lærdomen me tek av dette handlar fyrst og fremst om kvalitetssikring. Dei som kjenner oss veit at me ikkje tek lett på ei sak som dette, og at me kjem til å gjere alt me kan få å unngå at noko sånt skjer i framtida.
Fekk nytt tilbod
Næss-Hartmann presiserer at det ligg mykje arbeid bak å lage slikt innhald, noko kanskje ikkje alle tenker over.
– Influensarar har mykje meir makt enn fleire ulike brands. Det er mykje me må gjera for ei sånn kampanje. Det skal lagast manus, kjøpast inn det som trengst, filmast, redigerast og så må det postast slik at det treff den målgruppa ein ynskjer.
Ho seier at det ho reagerer mest på her er måten PR-byrået hadde skrive e-posten.
– Eg har fått mange førespurnadar opp igjennom når det gjeld å ta imot ting mot å lage innhald, men i denne situasjonen handlar det mest om ordlyden i e-posten. At ein vil bli «assosiert med dei store profilane om ein tek dette samarbeidet» og i tillegg skulle skrive under på ei kontrakt for arbeidet ein gjer for eit gåvekort. Og når dei understrekar kor stor merkevara er, men samtidig seier at dei ikkje har pengar å betale deg.
Treningsinfluensaren seier ein ikkje føler seg særleg mykje verdt når ein tek imot ein sånn e-post, og samtidig ser at fleire influensarkollegaar legg ut samarbeid som dei fekk betalt for.
Sjølv svarte ho at ho ikkje gjorde gratisarbeid, og fekk tilbod om ein sum.
– Eg snakka og med andre rundt meg som hadde fått betalt for oppdraget, og høve til å ha ein konkurranse på instagrammen sin der ein kunne vinne eitt års forbruk av Old El Paso-produkt.