Arve Eliassen er instruktør i Norsk Luftambulanse. Han stilte seg i dag opp i ferjekøen på Flakk for å lære bilistar førstehjelp og kva dei skal gjere om dei kjem først til ei ulukke.
– Veit du kva du skal gjere, dersom du kjem til ein ulukkesstad, som førstemann?
Han spør bilist Eldbjørg Ellefsen.
– Eigentleg så veit eg jo det da, men det er ikkje sikkert eg gjer det, seier ho.
For det er ikkje så enkelt å ta grep når ein står midt opp i situasjonen.
Tre punkt
– Det viktigaste er å sikre staden, varsle 113 og sikre frie luftvegar til dei som eventuelt er skadde, seier Eliassen.
Norsk Luftambulanse informerte i dag bilistar på ferjeleie på Flakk om kva dei skal gjere ved ei ulukke.
Bilist Eldbjørg Ellefsen seier ho kjem til å gjere det ho kan ved ei ulukke.
– Eg kjem til å gjere så godt som eg kan, sjølv om helsa ikkje er så god, smiler ho.
Frie luftvegar
– Det er særs viktig å sørge for frie luftvegar, dersom nokon er medvitslause, seier Eliassen.
Det er berre eit enkelt grep som skal til.
– Folk kan gjere stor forskjell ved å kunne nokre enkle grep.