Gler seg til å snakke med folket om bøker

Kronprinsessa la tysdag ut på ei ny litteraturreise. Men før ho gjekk om bord på toget frå Trondheim hadde ho eit litterært møte med forfattarane Helga Flatland og Roy Jacobsen. Temaet på Trondheim Bibliotek var dei sjølvbiografiske bøkene på biblioteket, og kronprinsessa var nøgd etter møtet.

– Det var ein fantastisk start på reisa. No gler eg meg til å reise vidare og møte folket. Eg gler meg til å snakke med folk om kva dei leser og korleis dei leser, sa H.K.H kronprinsesse Mette-Marit.

Togreise

Like før klokka 10 tysdag morgon gjekk ho om bord på toget på Trondheim sentralstasjon, der reisa går vidare til Oppdal, Ringebu, Hamar og til slutt Lillehammer. På Lillehammer skal H.K.H kronprinsesse Mette-Marit opne Norsk Litteraturfestival.

I toget er den eine vogna bygd om til bibliotekvogn og vogna er fylt med favorittbøkene til kronprinsessa.

– Det blir to flotte dagar på toget, heldt H.K.H kronprinsesse Mette-Marit fram før togreisa.

I Oppdal er temaet for møtet med forfattarane Harald Rosenløw Eeg og Tore Renberg ungdomstid.

Viktig å presentere litteraturen

Forfattaren Roy Jacobsen var oppteken av kor viktig det er å snakke om litteratur etter møtet med kronprinsessa.

– Det er veldig fint. Me har no ein ekstremt god moglegheit til å presentere litteratur og det gjer eg med glede, sa Jacobsen.

Og forfattarkollega Helga Flatland var samd.

– Eg tykkjer det er flott. Og eg er glad for at kronprinsessa har lyst til å fronte litteratur på denne måten, sa Flatland.

• Les også: – Da min far døde var mye usagt

Ulike generasjonar

Kronprinsessa var oppteken av kor viktig det er å samtale med forfattarar av to ulike generasjonar på Trondheim Bibliotek.

– Det er fint å kunne samtale med forfattarar som skriver om identitet frå to ulike generasjonar. Det har vore eit flott møte, sa H.K.H kronprinsesse Mette-Marit.

Etter forfattarmøtet på Oppdal går ferden vidare sørover. Kronprinsessa skal vidare møte forfattarane Ida Hegazi Høyer og Maria Navarro Skaranger. Dei skal snakke med kronprinsessa om røter og identitet på Biblioteket i Hamar. Kronprinsessa skal møte ti norske forfattarar i løpet av den to dagar lange reisa.

• Les også: Mette-Marit: – Bibliotekene er livsviktige
• Les også: — Bryter ned tabuer om alkoholisme