– No er det dårleg luftkvalitet som følgje av svevestøv enkelte område i Trondheim.
Dette gjeld til dømes langs Elgeseter gate, Omkjøringsvegen og E6 på Tiller. Det melder kommunen torsdag.
Dei har alt sett i gang med reinhald og støvdemping for å få kontroll på situasjonen.
– La bilen stå
Kommunen følgjer situasjonen nøye saman med Statens vegvesen og Trøndelag fylkeskommune.
Dei vurderer fortløpande behovet for fleire tiltak.
Slik ser kartet ut for Trondheim fredag ettermiddag. Gul farge svarer til moderat luftureining. Raud svarer til høg.
Foto: Luftkvalitet i NorgeNy informasjon kjem fredag.
– I mellomtida oppmodar vi til å la bilen stå om mogleg.
Luftureininga kan gå spesielt utover astmatikarar og personar med andre luftvegssjukdommar eller hjarte-kar-sjukdommar.
Den kan også påverke barn, gravide og eldre.
– Personar i desse gruppene bør redusere høg aktivitet og opphaldstid i dei mest ureina områda. Luftvegsirritasjonar og ubehag finst også hos friske personar.
Raudt også i Bergen
Ifølgje Luftkvalitet i Norge, er ureininga moderat i Trondheim torsdag kveld.
Men fredag varslar dei høg ureining – og ikkje berre i trønderhovudstaden.
Varsla luftforureining i nokre av Noregs byar frå torsdag til fredag.
Foto: Luftkvalitet i NorgeBergen kommune skriv på nettsidene sine at dei ventar moderat til høg luftureining. Dette gjeld langs trafikkerte vegar i sentrum i rushtida fredag.
Også i byar som Ålesund og Tromsø finn vi høg ureining fredag, ifølgje dette kartet.
Luftkvalitet i Norge sitt råd til den generelle befolkninga ved høg luftureining er klar:
– Utandørs aktivitet blir vanlegvis tilrådd. Personar med symptom som hoste eller sår hals bør vurdere å redusere høg fysisk aktivitet i dei mest ureina uteområda.