Folk i alle aldrar hadde møtt opp for å få eit betre helsetilbod i byen. Ei av dei var Edel Thomassen.
– Vi vil ha sjukehus i Alta. Det er så lett som det, seier ho.
Søstera Thea Thomassen er einig.
– Eg synest det burde vere minstekravet her oppe. Vi er her for å støtte det.
Mora Solveig er samd med døtrene:
– Det er veldig viktig for heile Vest-Finnmark at vi får sjukehus til Alta. Vi må berre stå på og vise og synleggjere oss. Vi må ikkje gi opp.
Dei meiner det var godt oppmøte sjølv om det var på ein fredag midt i arbeidstida.
Torsdag kom det fram at dei tilsette ved Klinikk Alta ikkje får lov å gå i fakkeltog i arbeidstida.
Styret og direktør Ole Hope ønsker i tillegg å bygge ned dagkirurgien i Alta.
– Kan ikkje gi opp
Ein annan som hadde møtt opp var Fredrik Arnesen, saman med broren John Einar.
– Trur du markeringa har noko for seg?
– Ja, det trur eg. Verkeleg. Vi har fått Pasientfokus inn på Stortinget, så det går framover.
– Ein kan ikkje gi opp berre fordi nokon seier at det ikkje blir.
Det har tidlegare kome fram at Finnmarkssjukehuset meinte ei ekstra operasjonsstue ved klinikken kunne øydelegge for Hammerfest sjukehus.
John Einar meiner det ikkje er bra nok.
– Eg trur ikkje ein kan slutte å kjempe for det sjølv om det er ganske håplaust. Det ser ganske dårleg ut for vår del med helsetilbodet.
Behalde alle tenestene
John Einar Arnesen meiner det er altfor lite folk som har møtt opp, og fortel at han sjølv har tatt fri frå jobb for å gå i toget.
– Det gjer at myndigheitene ikkje berre kan feie det bort når det er så stort engasjement i folket. Det er eit sterkt signal til politikarane og den som har makt.
Ved å leggje ned dagtilbodet i Alta, meiner kirurg Houman Charani at ein går fleire steg tilbake i forhold til å utvikle eit akuttilbod i Alta.
John Einar meiner det ikkje er realistisk med tre sjukehus i Finnmark i framtida, men håpar at dei kan få meir tenester til Alta. Da slepp folk å reise langt for å få hjelp, meiner han.
– Spesielt fødetilbod er viktig for oss. Eg har sju barn sjølv, og det er viktig at ein har tryggleik når ein skal føde barn.
John Einar forstår at det kan vere vanskeleg for dei eldre å reise langt
– Det er viktig å behalde alle tenestene vi kan her. Vi har tapt kampen om sjukehuset, så må vi vel prøve å behalde det vi har, i det minste.
Dagkirurgien nedlagd
Direktør i Finnmarkssjukehuset Ole Hope hadde eit møte med Alta kommune som han syntest var konstruktivt.
– Vi lyttar, men vi har utfordringsbildet vårt. Så vi må sjå desse tinga i samanheng, seier Hope til NRK i ein pause.
Han bekreftar at dagkirurgien i Alta allereie er vedtatt nedlagd – under ein klar føresetnad: At det ikkje kjem fram noko uventa i ein ny risikoanalyse, som skal leggast fram på styremøtet i februar.
Hope seier det er langt meir komplisert å flytte kirurgiske oppgåver til Alta enn det mange debattantar har lagt til grunn.
– Vi snur alle steinar. Men det er ikkje sånn at vi berre kan berre hente ein kirurg. Eit poeng her er at ein skal vere i eit miljø. Kor interessant er det å bli tilsett som kirurg for å gjere små ting i Alta når du tilhøyrer eit stort akuttsjukehus? spør Hope.
– Får vi fatt i ein kirurg, så er det rettast for sjukehuset vårt å plassere den kirurgen i akuttlinja.
Det er eit heilt apparat som høyrer med rundt ei kirurgstilling. Ei flytting vil utarme den kapasiteten dei har i Hammerfest, seier Hope.
– Vi skaper ikkje meir kapasitet ved å flytte nokon til Alta. Vi skaper mindre kapasitet. Og det er å gå baklengs inn i framtida.