Svikta då det gjaldt som mest

Griezmann har blitt hylla av alt og alle, etter eit fantastisk EM, der han står igjen som toppscorar og ein av turneringas beste spelarar.

Men då sluttsignalet gjekk i EM-finalen var det ein knust 25-åring som stod att på grasmatta, med jublande portugisarar i bakgrunn.

Fullstendig klar over at han hadde sjansen til å avgjera finalen, med to store sjansar på hovudet. Ein i starten av kampen, og ein midtvegs i andre omgang.

– Fotball er vondskapsfullt, men også fantastisk. Du får heile spekteret av kjensler, og av og til går det ikkje slik ein vil, seier Griezmann etter kampen.

• Les også: «Griezmann er det motsatte av Ronaldo»
• Les også: Frankrikes hemmelige luftvåpen er 175 cm høy

To store sjansar

Den første sjansen kom etter eit glimrande oppspel frå Dimitri Payet, der Griezmann stakk inn bak forsvaret til Portugal. Han fekk heada ballen i boge over keeper, men Rui Patrício klarte å slå over på meisterleg vis. I andre omgang fekk han stå ganske aleine i feltet, men headinga gjekk over (sjå video lengre nede i saka).

– Eg hadde mine sjansar og var nære på, men vi klarte ikkje å vera like effektive som mot Tyskland, seier Griezmann om sjansane sine.

– Vi kasta bort ein stor sjanse til å vinna tittelen. Det finst ikkje ord for å skildra den kjensla. Vi er enormt skuffa. Det kjem til å ta tid å komme over dette, seier den franske landslagssjefen, Didier Deschamps, etter at finalekampen var eit faktum.

Trass i finaletapet, Griezmann vil gå ned i historiebøkene som EMs toppscorar.

– Eg vil nok kunne gleda meg over det seinare, men akkurat no er eg skuffa over at vi ikkje klarte å vinna pokalen, seier Griezmann.

Griezmann fekk denne sjansen etter ti minutt av kampen.

Og midtvegs i andre omgang fekk han nok ei gyllen sjanse.

Det var Atletico Madrid-spelaren sitt andre finaletap mot Cristiano Ronaldo på seks veker. Han var også med å tapa meisterligafinalen med mot Real Madrid i slutten av mai.