No må dei på kurs for å få køyre motorsykkel i sykkelfeltet

– Eg er veldig godt nøgd. Det er ein omfattande handlingsplan, der nokre ting trer i kraft med ein gong, medan andre ting ikkje vert fiksa over natta, seier presidenten i Norges Cykleforbund, Harald Tiedemann Hansen til NRK.

Det internasjonale sykkelforbundet, UCI, har hatt styremøte denne veka der har blant anna regulering av køyretøy i sykkelfeltet har vore samtaleemne.

Skjerping vert høyrd

Sikkerheita til syklistane har vore eit heit samtaleemne denne våren, etter at belgiske Antoine Demoitie omkom etter eit samanstøyt med ein motorsykkel under Gent-Wevelgem i mars.

Førre veke hamna Stig Broeckx i koma etter ein massevelt, som kom etter at to motorsyklar velta inn i feltet i høg fart. Norske Vegard Breen og Kristoffer Skjerping gjekk ned i velten, og Skjerping gjekk hardt ut mot sikkerheita i sykkelritt.

– Vi ser heilt sinnssjuke ting i feltet, sa han.

Han ønska blant anna kursing av motorsyklistane, og det er eit av emna i handlingsplanen.

– Det viktigaste er at det no vil bli kursing av dei som skal nytta køyretøy i sykkelfeltet. Tidlegare har det vore opp til arrangøren å bestemme kven som har fått køyre, men no skal vi sette ting i system, seier Tiedemann Hansen.

Utøvarane verkar nøgd

Eit anna tiltak er tak på kor mange køyretøy som får vera med i dei forskjellige ritta.

– Det har ikkje vore tak på dette før. Vi må sjå kor mange som trengst i kvart ritt og vurdera deretter, seier Tiedemann Hansen.

Køyretøy som passerer feltet i stor hastigheit har også vore eit problem.

– Det vert strengare kontroll og dei som ikkje følgjer reglane risikerer å verta utestengd, fortel Tiedemann Hansen.

– Korleis har syklistane reagert på handlingsplanen?

– Det sitt ein utøvarrepresentant i styret og han verka godt nøgd med den. Eg håpar at ryttarane vil føle seg tryggare når alt dette trer i kraft, avsluttar Tiedemann Hansen.