Mowinckel: – Det har vore vanskeleg å halde kjenslene tilbake, spesielt etter utforrennet

– Eg hadde små forventningar til meg sjølv i slalåm, så dette er eg nøgd med, seier Mowinckel. – Eg gav det eg hadde og kom ned på ein okei måte, seier Molde-jenta som var 29 hundredeler frå sin tredje medalje i årets OL.

Ho grin ikkje det minste for det mange kallar den sure fjerdeplassen. – Eg hadde som mål å gjere det betre enn sjetteplassen i Sotsji, og det greidde eg.

– Eg er så stolt og nøgd med det eg har fått til, seier ho til NRK. Mowinckel har allereie sølv frå både storslalåm og utfor.

– Det har vore vanskeleg å halde kjenslene tilbake, spesielt etter utforrennet.

– Spinnvilt

– Kva har vore høgdepunktet?

– Vanskeleg å seie. Men å få sin første OL-medalje er sjølvsagt ei enormt god kjensle. Den neste var også heilt spinnvilt, seier Mowinckel.

Ho seier ho har prøvd å stengje ute kjenslene og berre tenkt nokre timar framover under OL-opphaldet i Sør-Korea.

– Men no når eg kan setje meg ned og slappe av, vil det nok sige inn over meg kva eg har vore med på. Då blir det nok også ei stor bølgje med masse kjensler.

Vonn: – Ranghild blir langt oftare på pallen

Alpinveteran og superstjerne Lindsey Vonn er imponert over Mowinckel.

– Ho har skaffa seg sjølvtillit og kjem til å bli ein mykje tøffare konkurrent framover. Ho var stor som junior, og har brukt litt tid på å kome til topps også som senior. Ho blir å finne på pallen langt oftare framover. Ho har det som skal til for å bli ein vinnar, seier Vonn.

Den amerikanske stjerna fall i finaleomgangen i det ho sjølv trur var hennar siste OL-start.

– Ragnhild byggjer og byggjer, og du ser at ho er svært god. Det går fort, utan at ho tek store sjansar, og det vakkert å sjå på.

– Imponert, men ikkje overraska

Mowinckels trenar Tim Gefeller seier til NRK at ho har oppnådd mykje meir enn venta.

– Ho har hatt eit utruleg OL, som eg er stolt og imponert over. Men ikkje overraska.

Han har si forklaring på korleis Mowinckel har greidd å halde kjenslene i sjakk under OL-opphaldet.

– Vi har prøvd å halde ei lett stemning desse to vekene, og ikkje ta det altfor alvorleg. Vi tek konkurransane alvorleg, sjølvsagt, men utanfor bakken har vilagt vekt på å halde ei avslappa stemning. Sjølv har Ragnhild gjort ein kjempejobb med å halde kjenslene i sjakk.

– Kor vanskeleg er det for ein utøvar?

– Det er ei stor utfordring. Di meir røynsle du har, di betre går det. Ragnhild har vakse mykje, både som idrettsutøvar og som person.

– Korleis skal du jobbe for å få henne heilt til topps?

– No skal ho først avslutte verdscupsesongen, på beste måte, håpar eg. Så skal vi setje oss ned og finne ut korleis vi skal angripe det.

Nummer to etter utfor

Mowinckel låg på andreplass etter utfordelen, 74 hundredelar bak Lindsey Vonn, og tre hundredelar betre enn Michelle Gisin.

Men slalåmomgangen var ikkje god nok. Som nest siste startande køyrde Mowinckel inn til fjerdeplass, 1,73 bak leiande Michelle Gisin. Ho tapte tid heile vegen ned i den korte slalåmløypa.

– Ho er litt uheldig med at det tok til å snø like før ho skulle køyre, sa NRK-kommentator Lars Elton Myhre.

– Litt stang ut der. Men det er ein sterk prestasjon likevel, seier kommentator-kollega Thomas Lerdahl.

Lindsey Vonn leia etter utfordelen og hadde 77 hundredeler til gode på Gisin. Men Vonn køyrde ut tidleg i slalåmomgangen. Michelle Gisin vann med 97 hundredeler framfor Mikaela Shiffrin og Wendy Holdener.