Kulturministerens ultimatum: Sjakken må bli ein del av idretten for å få meir pengar

Men Trine Skei Grande meiner idrettsforbundet og sjakkforbundet må finne ei løysing utan politisk innblanding.

Trine Skei Grande

MINISTER: Kulturminister Trine Skei Grande seier det er mot sjakkens struktur å ikkje går ein vinnar

Foto: Terje Pedersen / NTB scanpix

Bakgrunnen er NIFs krav om at det ikkje skal kårast vinnarar i barneidrett, det vil seie under 12 år. Dette er kravet som har stått i vegen for at Noregs Sjakkforbund (NSF) skulle blitt medlem i Noregs Idrettsforbund, og dermed kunne nyte godt av tippemidlar.

NSF meiner at det er veldig vanskeleg å nå toppen utan å konkurrere i ung alder.

Vi kan sjølvsagt endre tildelinga gjennom spelmidlane, men det har vi ingen planar om å gjere no. Eg håpar dialogen mellom sjakkforbundet og idrettsforbundet kan utvikle og finne nokre gode grensegangar, seier kulturminister Trine Skei Grande til NRK.

Problemstillinga kom til overflata tidlegare i sommar, i samband med bettingselskapet Kindreds tilbod om 50 millionar kroner til sjakken, mot at sjakkforbundet skulle arbeide aktivt for å avvikle spelmonopolet i Noreg. Eit tilbod sjakk-kongressen til slutt takka nei til.

Krevjande å bli god utan tidleg konkurranse

Magnus Carlsen

TIDLEG GOD: Mangedoble verdsmeister Magnus Carlsen blei stormeister allereie som 13-åring, den nest yngste gjennom tidene

Foto: Jørund Wessel Carlsen / NRK

– Er det umogeleg å bli meister om ein ikkje får konkurrere i ung alder?

– Ein skal aldri seie aldri, sa NSFs generalsekretær Geir Nesheim til NRK i førre veke.

– Men i sjakken er det ei allmenn oppfatning at ein må byrje tidleg for å bli veldig god når ein er 15–18 år. Då skal ein helst vere stormeister og nærme seg verdstoppen for å kunne gå heile vegen i løpet av karrieren.

– Om ein ikkje får spele internasjonalt før i 12-årsalderen, blir det veldig krevjande, sa Nesheim.

I samband med sjakk-OL i Tromsø i 2014 var det forhandlingar om NIF-medlemskap, men det førte ikkje fram.

– Diskusjonen vil kome opp igjen, trur Nesheim.

– Sjakken og idretten må finne ut av dette

Geir Nesheim, generalsekretær i Norges Sjakkforbund

VANSKELEG: – Om ein ikkje får spele internasjonalt før i 12-årsalderen, blir det veldig krevjande å gå til topps, seier NSF-general Geir Nesheim.

Foto: Roy Kenneth Sydnes / NRK

Korleis det skal gjerast i Noreg, vil ikkje kulturministeren ha noka meining om.

– Det som idretten og sjakken må finne ut av, er korleis regelverket skal handterast. Det skal ikkje ein statsråd legge seg opp i.

Grande følgde Kindred-debatten tett, men ho vil ikkje meine noko om at det er eit utanlandsk betting-selskap som stod bak.

– Er du uroa over at bettingbransjen flørtar med sjakkforbundet – eit sveltefôra forbund som knapt har pengar på bok?

– Vi skal bidra til gode løysingar, men no er det ein dialog mellom sjakkforbundet og idrettsforbundet. Den skal ikkje eg blande meg borti. Eg har stor tillit til at dei finn gode løysingar sjølv.

I kjølvatnet av Kindred-debatten har NIF på nytt invitert NSF til forhandlingar om medlemskap. Det ser Nesheim positivt på.

– Eg veit ikkje om det er noko nytt sidan sist. Vi skal nok ha ein prat med idrettsforbundet, men først må sjakken diskutere spørsmålet internt.

Siste nytt

  • Hovland avslutta forrykande

    Viktor Hovland avslutta med birdie og leiar nå PGA-turneringa i golf i Puerto Rico før søndagens avslutningsrunde. Hovland låg på delt leiarplass før laurdagens tredjerunde, men med godt spel la han alle konkurrentane bak seg. Han varta opp med heile åtte birdiar og kan nå ta sin aller fyrste siger på PGA-touren. Åtte slag under par på runda og totalt 18 slag under par i turneringa er fasiten etter endt spel laurdag.

    Viktor Hovland i Puerto Rico
    Foto: Kevin C. Cox / AFP
  • Real Madrid gjekk på smell

    Real Madrid rauk på eit surt 0-1 tap heime mot Levante laurdag kveld. 11 minutt før full tid blei Jose Luis Morales matchvinnar da han traff perfekt på volley frå spiss vinkel. Barcelona vann derimot 5-0 mot Eibar og har dermed tatt over serieleiinga og har to poeng ned til hovudstadslaget.

    Real Madrid tapte mot Levante
    Foto: Alberto Saiz / AP
  • Kristoff krasja med gutt etter mål

    Alexander Kristoff var uheldig og krasja med ein liten gut etter å ha passert målstreken i sykkelrittet Algarve rundt. Både Kristoff og guten blei lettare skada i uhellet som skjedde på veg ned etter målgang frå fjelletappen i Tavira. – Eg køyrde normalt, og plutseleg kom ein gut springande ut rett framfor meg, og da var det umogleg å unngå og krasje, seier Kristoff til TV 2.

    Alexander Kristoff
    Foto: Fredrik Hagen / NTB Scanpix

Sendeplan

Kl. Program Kanal