Følgde råda frå kjærasten – «spådde» eiga framtid

– Eg har aldri gitt heilt slepp, og det angrar eg ikkje på no.

Det er ikkje eit mirakel eller eit slumpetreff at Timon Haugan endeleg lykkast i storslalåm. Eit viktig tips frå kjærasten og ein gammal kjenning blei viktige ingrediensar på vegen.

Men det var ikkje gitt at det skulle gå.

For vel eitt år tilbake i tid, var 27-åringen på det absolutte botnpunktet sitt.

– Kjente meg mislykka

For då NM i Trysil var over og alle lagkameratane reiste heim, måtte Haugan bli igjen heilt aleine. For å køyre ein dansk meisterskap.

– Der kjente eg at eg var på botn. Eg kjente meg så mislykka på ein måte, fortel Haugan til NRK.

For sjølv om slalåmkøyringa fungerte, var han langt frå toppen i storslalåm. Ei grein han har slite med i mange år og fleire gonger har han tenkt at det ikkje går.

– Eg var einaste på laget som måtte bli igjen for å kunne få betre ranking for året etter, seier han.

Før denne sesongen hadde han berre fått poeng i eitt av 19 storslalåmrenn i verdscupen.

Då bestemte han seg. «Dette skal ikkje skje igjen».

Les også Tror Braathen får stjernestatus i Brasil: – En perfekt kombinasjon

– Han har alltid hatt trua

For Haugan ville ikkje gi opp. Han tok kontakt med den gamle trenaren sin Hallgeir Vognhild, som han hadde hatt på Oppdal skigymnas.

– Eg ringde han og fortalde akkurat kva eg kjente. Eg sa at eg kjente meg skikkeleg mislykka. Sjølv om mange kanskje ikkje ser på det sånn, seier 27-åringen.

Dei sette seg ned og la ein plan den følgande påska. For å finne ut kva han måtte bli betre på og kva han måtte gjere for å klare det.

– Han er ein av få som alltid har meint at eg aldri må gi opp storslalåm. Han har alltid meint at eg har noko der å gjere. Han har alltid hatt trua. Meir tru enn eg kanskje nokon gong har hatt, seier Haugan.

Slik blei påskeferien planlagd. Før heisen opna i Oppdal var dei oppe i bakken og trena storslalåm i tre dagar saman.

Men det var ikkje det einaste grepet han tok.

Les også Kildes oppgjør: – Om jeg skal komme tilbake, må noe endres helt øverst i Skiforbundet

Høyrde på kjærasten

For rundt same tid tok han pennen fatt og byrja å skrive dagbok.

– Eg byrja med det for vel eit år sidan, og det hjelper for å få tankane ut av hovudet. Eg kjenner eg får det litt meir bort når eg får det ned på papir, og så er det eit bra verktøy å ha for å gå tilbake, seier 27-åringen.

Det nye verktøyet kom etter tips frå ein annan som står han nær.

– Det var faktisk kjærasten min som anbefalte at eg skulle gjere det. Ho hadde gjort det litt, og så tenkte eg «kvifor ikkje?», seier 27-åringen.

– Skuldar henne ein liten takk, då?

– Ja, eg gjer det. Eg er veldig takksam.

Og det er han kanskje ekstra glad for no. For dette skreiv han to veker før han tok sin første pallplass i storslalåm:

– Ja, eg skreiv at eg følte at eg hadde farten til å vere på pallen. Eg tenkte aldri at det skulle skje no, men eg følte at no klarer eg å sjå for meg sjølv ein eller annan dag at eg kan «palle» i storslalåm, og den kjensla har eg aldri hatt før no nyleg eigentleg, seier Haugan.

Eit nytt kapittel

Denne sesongen er nemleg ei heilt anna historie for Haugan. Målet for sesongen var å komme seg innan topp 30 i storslalåm. No er han nummer 19 i storslalåmcupen, og krona det harde arbeidet med ein pallplass i USA.

Eit arbeid han er glad endeleg har gitt resultat.

– Eg har kanskje jobba hardt med det i mange år, utan at eg har fått noko bra betalt for det. Så eg er veldig glad for det, seier Haugan.

• Laurdag køyrer Haugan og dei andre norske den siste storslalåmen i sesongen, og det kan du sjå på NRK1 eller NRK TV frå kl. 09.00.

null

Spiller nå

Scorer fra egen banehalvdel (!) 00:28

Neste

Sjå monsterhoppet til Kobayashi 00:25 Gikk på kjempesmell på direkten – må tatovere seg! 01:31 Paris-politiet «rydder» gatene for migranter før OL 00:54

Vis flere