Oppløyst i tårer etter finalefiasko: – Unnskyld for at eg ikkje var god nok

27-åringen klarte ikkje å halde tårene tilbake etter at meisterligatittelen glapp, og det i eit 3-1-tap mot Lyon.

Få hadde venta at Barcelona skulle tape så stort. Faktisk hadde både odds og fleire ekspertar sett spanjolane som førehandsfavorittar.

Dagen etter finalen skriv Hansen ein unnskyldning til Barcelona-supporterane på Instagram.

– Unnskyld for at eg ikkje var god nok. Unnskyld for at vi ikkje kunne gje dykk det de fortente: Sigeren

– Måten de har vore der med oss i år er noko eg alltid kjem til å vere takknemleg for å ha opplevd. De har vore stjernespelaren vår heile sesongen. Takk for at de kjempa heilt til slutt. Eg veit at det gjer vondt i dag. Så når det forhåpentlegvis går over, så håper eg at de er villige til å prøve igjen. Når tida er inne og de har kvilt dykk godt. Tusen takk, skriv Graham Hansen.

Kommentarfeltet blei raskt fylt opp av støtteerklæringar, blant anna frå både tidlegare og noverande landslagsveninner.

Barcelona var tittelforsvararar i meisterligaen. I fjor greidde ikkje Lyon å ta seg vidare frå kvartfinalen i den gjeve turneringa.

Det store tapet kom difor overraskande på fleire, men mest ilt var det for Barcelona sjølv.

– Det er tungsinn i garderoben no. Vi er lei oss og føler med supporterane våre som tok turen hit. Det kjendest ut som vi hadde heimekamp, sa Barcelona-trenar Jonatan Giráldez på pressekonferansen etter meisterligafinalen.

Bomma på planen

NRKs ekspert Carl-Erik Torp meiner at det var ein ting som openbert skilde dei to laga: Sjølve inngangen på kampen.

– Det er alltid marginar som gjer at det blir som det blir, men Barcelona klarte ikkje å stå av det høge presset som Lyon påførte dei i opningsminutta. Barcelona var lette å lese. Det var skuffande, seier Torp til NRK.

Han er klar på at begge lag har hatt like lang tid på å førebu seg, men at det verkar som eitt lag hadde lagt ned meir arbeid i å analysere motstanden.

– Det verkar som Lyon hadde fokusert meir på korleis dei skulle ta Barcelona, medan Barcelona fokuserte på seg sjølv. Dei trefte veldig bra på det. Barcelona skal alltid prøve å spele seg ut av presset, og når det ikkje går, fungerer ikkje resten av delen. Det var akkurat det Lyon ynskja, seier Torp.

Sjølv er han mest overraska over at Barcelona ikkje klarte å løyse motstanden betre.

– Dei klarar ikkje å justere seg for å finne rommet som er der. Dei blei veldig smale på venstresida, det blei trongt og dei skulle inn i midten. Men det er deira måte å spela på. Dei stanga imot eit Lyon som verka veldig komfortable. Det er sjeldan vi ser dei skape så lite, seier Torp.

Skuffa over prestasjonen

Fleire av ekspertane til NRK trudde på førehand at Barcelona skulle vere meir synlege enn dei stod fram i finalen.

Vålerenga-spelar Elise Thorsnes, som var gjest i NRKs studio, var oppriktig skuffa over det spanske laget ved kampslutt.

– Dei var passive og mista mykje ball. Ein er vand til at Barcelona fører kampane og har full kontroll, men her var det mykje slurv. Det er overraskande for meg at Lyon vann, seier Thorsnes til NRK.

Den kjensla brenn nok Caroline Graham Hansen inne med sjølv, også, men Torp meiner at ho skal halde hovudet heva, etter som ho gjekk av bana med ein målgivande.

– Det er fantastisk for oss nordmenn. Det er sjølvsagt beinhardt for Graham Hansen og Engen å tape dette. Det blei ein vanskeleg kamp for Hansen. Ho blei litt defensiv mot sin venstre back og det prega resten av kampen, dessverre. Ho blei ikkje sett opp slik vi pleier å sjå ho. Ho fekk lite plass, seier Torp.

Likevel meiner han at årets meisterligafinale føyer seg inn i rekkene som ein av dei beste han har sett.

– Kvalitetsmessig er det, og det er to nordmenn som pregar dei prestasjonane, seier han.