Boasson Hagens lag har sju nordmenn på ønskelista

– Vi har 6-7 nordmenn på lista. Kven vi går for blir avgjort av Edvald. Han er veldig fokusert på å utvikle norsk sykkelsport, seier seier Team Dimension Datas sportsdirektør, Douglas Ryder.

Dei siste dagane har det vore mykje snakk om at spurttalentet Sondre Holst Enger er på veg til årets mestvinnande lag i Tour de France.

• Følg 12. etappe: Montpellier - Mont Ventoux.

Men Ryder fortel at det raskt kan bli ein annan rytter. Sportsdirektøren antydar at den neste, norske signeringa kan bli ei overrasking.

– Vi ser også på norske ryttarar frå lag du ikkje ville tenke deg at vi henta frå normalt sett, seier Ryder.

– Det er mange som er meir enn gode nok for dette sirkuset. Derfor vil eg hjelpe dei ut, seier Boasson Hagen.

Vil bygge klassikarlag med norsk hjelp

Sportsdirektør Ryder vil ikkje utdjupe kven han snakkar om, men fortel at målet er å hente inn klatrarar og ryttarar som kan styrke klassikar-laget.

– Klassikarane blir meir og meir viktige fordi det kjem fleire ritt inn i klassikarprogrammet neste sesong. Dermed blir det like viktig å vinne dei som Grand Tourane (Tour de France osv.). Som eit lag vil vi fokusere på å vinne eindagsritt slik at vi kan utvide veldedige organisasjonen vår, fortel Ryder.

– Elskar nordmenn

Vidare fortel han at dei ikkje har vore i konkrete samtalar med Holst Enger, som ifølge avgent Joona Laukka har fått tre tilbod om kontrakt under Tour de France.

– Det er rykter rundt Holst Enger og oss, men vi har ikkje hatt konkrete samtalar med han. Vi har faktisk ikkje vore i samtalar med nokon enno, seier Ryder, som vil ta seg god tid saman med Boasson Hagen før han plukkar ut den rette:

– Vi må vere sikre på at den vi går for vil passe godt inn. Vi elskar nordmenn, avsluttar sportsdirektøren.