♦ Det blir sett av 650 millionar kroner for å redusere arbeidsløysa på Sørlandet, i Rogaland, Hordaland, Sogn og Fjordane og Møre og Romsdal som følgje av krisa i oljesektoren. Dette er nær 250 millionar kroner meir enn i fjor, ifølgje regjeringa. Kommunane på Sørlandet vil få nær 70 millionar kroner av denne potten. Kommunar som har høgare arbeidsløyse enn landsgjennomsnittet får pengar. Kommunane får 56.700 kroner for kvar ledige arbeidssøkar over snittet på 3,1 prosent.
♦ Det er sett av 50 millionar kroner til fengsel i både Mandal og Froland. Pengane skal gå til detaljplanlegging av dei to nye fengsla. Ordførarane i dei to kommunane håpar på byggestart hausten 2017. Pengane kjem i tillegg til dei 15 millionane som Stortinget tidlegare har bevilga til planlegging av fengsla.
♦ 250 millionar kroner til fornyingsarbeid på Sørlandsbana og Jærbana.
♦ Det er sett av 29 millionar kroner i statlege midlar og 10 millionar i lokale tilskot til utbygging av riksveg 9 ved Skomedal i Bygland. Det er også sett av pengar til restarbeid i samband med bygging på deler av gang- og sykkelveg på strekninga Harstadberg-Valle.
♦ Regjeringa føresler å auke tilskotet til Stine Sofie Senteret i Grimstad med fem millionar kroner. Senteret er eit nasjonalt senter for valdsutsette barn, deira omsorgspersonar og søsken. Auken inneber eit samla driftstilskot på 20 millionar neste år.
♦ Nasjonal kommunikasjonsmyndighet (Nkom) i Lillesand får 209,9 millionar kroner til drift i regjeringa sitt statsbudsjett. Dette inneber ei auke på 12,9 millionar kroner, som inkluderer fem nye stillingar.
♦ Regjeringa har sett av pengar til påløpte kostnader knytt til bygging av ny E18 mellom Arendal og Tvedestrand. Dette inneber blant anna førebuande arbeid.
♦ Regjeringa føresler å bevilge 45,2 millionar kroner til ei utvida transportordning for rullestolbrukarar, blinde og svaksynte. Ordninga gjer eit transporttilbod på kring 200 turar per år. Pengane skal delast mellom Aust-Agder, Møre og Romsdal, Nord-Trøndelag og Østfold.
♦ Det er sett av to millionar kroner til nye rekrutteringsstillingar ved Universitetet i Agder (UiA) i Grimstad.
♦ Regjeringa føresler å bruke 23 millionar kroner til regional utvikling i Aust-Agder. Målet er blant anna auka verdiskaping, sysselsetting og eit internasjonalt konkurransedyktig næringsliv. I tillegg vil dei utvikle attraktive regionar for folk og næringsliv.
♦ Regjeringa føresler å vidareføre tilskotsordninga for sysselsetting av sjøfolk. I 2015 var om lag 270 sjøfolk i Aust-Agder omfatta av tilskotsordninga.