Bilete er teke av ein flypassasjer som fauk over området tidlegare torsdag ettermiddag.
Brannhelikopteret kom til Birkenes i 18-tida torsdag kveld.
NRK får opplyst frå brannmannskap på staden at det framleis ikkje er kontroll over brannen. Det er heller ikkje klart kor stort område som står i brann.
Hus og hytter i nærleiken
Det er førebels ikkje fare for at brannen skal spreie seg til bygningar.
– Det er hytter og hus i området, men eg har forstått det slik at det ikkje er fare for bebyggelse på noverande tidspunkt, seier Birkenes-ordførar Arild Windsland til NRK.
Han fortel at kommunen sitt kriseteam står klar ved behov.
I tillegg til brannhelikopter deltek Sivilforsvaret og brannmannskap frå fire kommunar på Sørlandet.
Starta etter bålbrenning
Brannen starta etter at to personar fyrte opp eit bål i området torsdag ettermiddag.
Flammane spreidde seg til kratt i nærleiken og utvikla seg til ein skogbrann.
To personar er sende til legevakta for sjekk for røykskader.
Brannvesenet reknar med at sløkkearbeidet vil pågå utover natta.